Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 546 Hüküm no: 675 Orijinal metin no: [91a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ceyen v. Miho’nun Tarabo ve Yuvan’a olan borcunu ödemesi Bâ‘isü’l-i‘lâm Tarabo v. Yuvan nâm zimmî Davudpaşa Mahkemesi’nde meclis-i şer‘de Ceyen v. Miho nâm zimmî muvâcehesinde mesfûr Ceyen zimmî zimmetinde mukaddemâ yedimden istidâne ve kabz eylediği cihet-i karzdan on beş guruş alacak hakkımın altı guruşunu yedinden ahz ü kabz edip dokuz guruş zimmetinde bâkī kalmağla hâlâ taleb ederim deyü ba‘de’d-da‘vâ ve’l-istintâk mesfûr Ceyen zimmî dahi cevâbında kaziyye vech-i muharrer üzere olduğunu ikrâr lâkin müdde‘î-i merkūmun kabzını mu‘terif olduğu meblağ-ı mezbûr altı guruşdan mâ‘adâ dokuz guruşu dahi merkūm Tarabo zimmînin İslâmbol’da Çırçır kurbünde vâki‘ bir bâb gevrekçi fırını arsasında beher yevm yirmişer para ücret tesmiyesiyle on sekiz gün rençberlik etmemle müddet-i mezkûrede sebk eden hizmetimin ücret-i müsemmâsı olan cem‘an dokuz guruşa takas ve mahsûb edip ol-vechile deyn-i bâkī meblağ-ı mezbûr dokuz guruşdan dahi zimmetim berî olmuş idi deyü def‘ ve def‘-i mezkûrunu beyândan âciz ve talebiyle müdde‘î-i merkūm Tarabo zimmî ba‘de’t-tahlîfi’ş-şer‘î mûcebince meblağ-ı bâkī-i mezbûr dokuz guruşu merkūm Tarabo zimmîye edâ ve teslîme mesfûr Ceyen zimmîye tenbîh olunduğu bi’l-iltimâs huzûr-ı âlîlerine i‘lâm. Fî 11 min-Ra sene 1197