Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 264 Hüküm no: 220 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Andon’un Süleyman Paşa Vakfı’ndan kiralamış olduğu bostanın kira sözleşmesinin feshedilmesi Ma‘rûz, Mübârek Rikâb-ı kamertâb-ı hüsrevâneye takdîm olunan arzuhâlde mezkûretü’l-ism olup Hazîne-i celîle-i Evkāf-ı hümâyûn’dan mazbût idâre olunan evkāfdan sadr-ı esbak merhûm Süleyman Paşa Vakfı’nın bi’l-meşrûta mütevellîsi mu‘arrefetü’z-zât Hadice Hanım bt. Mehmed Nazif bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i fetvâ-penâhîde ma‘kūd meclis-i şer‘-i enverde sâhibe-i arzuhâl mu‘arrefetü’ş-şahs Meryem bt. Andon nâm Nasrâniye muvâcehesinde mütevellîsi olduğum vakf-ı mezkûr müstagallâtından medîne-i Üsküdar’da Kefçe mahalleside vâki‘ ma‘lûmü’l-hudûd icâre-i vâhideli bir bâb şükûfe bostanında mersûme Meryem Nasrâniye senevî ellişer guruş icâre ile aded ve sinîn beyân olunmaksızın müstecire olup ancak işbu sene-i mübârekede duhûl edecek Rûz-ı Kāsımı ibtidâsına izâfetle bi’t-tevliye fesh-i akd-i icâre etmemle târîh-i mezkûrede bostan-ı mezkûru tahliye ve bana teslîme mersûme Meryem Nasraniyeye tenbîh olunmak bi’t-tevliye matlûbumdur deyü da‘vâ etdikde mersûme Meryem Nasraniye dahi cevâbında bostan-ı mezkûrda senevî ber-vech-i muharrer ellişer guruş icâre-i vâhide ile müstecir olduğunu ikrâr lâkin vakf-ı mezbûrun mukaddemâ mütevelliyesi müteveffât Âişe Hanım hayatında bostan-ı mezkûrun sâbık müstecirleri yedlerinde derûnunda mevcûde gedik ta‘bîr olunur âlât-ı lâzıme-i ma‘lûme için bir kıt‘a gedik temessükü temhîr ve i‘tâ ve gedik-i mezkûr tedâvül-i eyâdî ile benim uhde-i tasarrufumda olmağla ol vechile bostan-ı mezkûru tahliye ve teslîmden imtinâ‘ ederim deyü takrîr-i meşrûhu üzere îrâd eylediği kelâmı bu makūle icâre-i vâhide ile îcâr ve istîcâr olunan akār-ı mevkūfe derûnlarında olunup ber-vech-i meşrûh istîcâr olunan gediklerin mahallerinden müstakır olması gedikler hakkında karârgīr olan şürût-ı müstahsene-i mer‘iyyede dâhil ve mu‘teber olmadığına mebnî şer‘an ve kānûnen müvecceh ve mültefet olmamağla iltifât olunmayıp ikrârı mûcebince bostan-ı mezkûru yevm-i mezkûrda tahliye birle mütevelliye-i merkūme Şerife Hatice Hanım’a teslîme mersûme Meryem Nasrâniyeye tenbîh olunduğu huzûr-ı âlîlerine i‘lâm olundu. Fî 18 R sene [12]57.