Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 549 Hüküm no: 680 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Ömer ve kefili oğlu Ahmed’in Fatma bt. Abdullah’a olan borçlarını ödemeleri İslâmbol’da es-Seyyid Ömer mahallesinde sâkine ve zâtı mu‘arrefe Fatıma bt. Abdullah nâm hatun Davudpaşa Mahkemesi’nde meclis-i şer‘de Ahmed b. Osman nâm kimesne mahzarında bundan akdem mezbûr Ahmed’in vâlidesi işbu hâzıratü bi’l-meclis Hadice bt. Ömer nâm hatun zimmetinde cihet-i deyn-i şer‘îden bâ-temessük yetmiş yedi guruşdan bâkī elli guruş alacak hakkımın edâsına tarafeynden emr ve kabûlü hâvî kefâlet-i sahîha ile oğlu mezbûr Ahmed kefîl ve zâmin olmağla meblağ-ı bâkī-i mezbûr elli guruşu mezbûr Ahmed’den kefâletine binâen taleb ederim deyü tesaddî eylediği da‘vâsından bâ-vesâtet-i muslihîn mezbûr Ahmed ile otuz üç guruş üzerine sulh olup mâ‘adâ on yedi guruşa müte‘allika da‘vâdan mezbûr Ahmed ile vâlidesi hâzıra-i mezbûre Hadice Hatun’dan her birinin zimmetlerini ibrâ ve ıskāt eyledikde onlar dahi sulh ve ibrâsını ba‘de’l-kabûl bedel-i sulh-ı merkūm otuz üç guruşu müdde‘iye-i mezbûre Fatıma Hatun’a bi’t-taleb edâ ve teslîme mezbûr Ahmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 16 Ra sene 1197