Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 264 Hüküm no: 221 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko bt. Yamandi’nin eşinin miras davasının haksız olduğu Ma‘rûz, Mahrûse-i Galata’ya muzâfe Mudanya kasabası mahâllâtından Aya mahallesinde mütemekkin iken bin iki yüz elli beş senesi Muharremi’l-harâmı hilâlinde hâlik olan ekmekçi Güryani v. Piro zimmînin verâseti zevce-i metrûkesi Eleniko bt. Yamandi Nasrâniye ile sulbî sagīr oğlu Panayot ve sulbiye sagīre kızları Kadınko ve Ezmerağda’ya inhisârı tahakkukundan sonra sıgār-ı mersûmûnun anaları ve tesviye-i umûruna vasiyy-i mansûbeleri sâhibe-i arzuhâl mu‘arrefetü’ş-şahs zevce-i mesfûre Eleniko Nasrâniye tercümanı Petro v. Kino zimmî hâzır olduğu hâlde evvelâ şifâhen sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ve ba‘dehu bi’r-rızâ dâr-ı hazret-i müşârün-ileyhde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde kasaba-i mezbûre çorbacılarından derûn-ı arzuhâlde ismi mastûr Togodoş v. Dimitri zimmî muvâcehesinde zevcim ve mûrisim hâlik-i mersûm Yani zimmînin hîn-i helâkında kasaba-i mezbûrede Çarşı mahallesinde kâin mütemekkin olduğu ekmekçi dükkânında mevcûde hâric-ez defter-i kassâm emvâli olup mersûm Togodoş zimmînin kasaba-i mezbûrede çorbacı olmak takrîbiyle bi-gayr-ı hakkın gasben ahz ve istihlâk eylediği bin iki yüz keyl hınta ve iki bin beş yüz vakiyye dakīkin kıymetleri olan yirmi altı bin beş yüz guruş ve kezâlik hâric-ez defter nakd-i mevcûdu olup dükkân-ı mezkûrdan zevcim hâlik-i mersûmun çekmecesinden gasben ahzeylediği üç bin beş yüz guruş ve yine hâric-ez defter zevcime mûrisim hâlik-i mersûmun sağlığında gāibûn ani’l-beled ma‘lûmü’l-esâmî kimesneler zimmetlerinde alacak hakkı olup ba‘de helâkihi benimle vasîleri olduğum sıgār-ı mersûmûna mevrûs olarak medyûnları gāibûn-ı merkūmûnun benimle sıgār-ı mersûmûn için bana vermek üzere mersûm Togodoş zimmîye ref‘ ü teslîm eyledikleri sekiz bin guruş ve zevcem ve mûrisim hâlik-i mersûmun sağlığında ile’l-helâk yedinde malı olup sene-i mezkûre Saferi’l-hayrının yirmi birinci günü târîhiyle müverrah kasaba-i mezbûre mahkemesi sicilinden muhrec bir kıt‘a defter-i kassâm nâtık olduğu üzere sûk-ı sultânîde lede’l-müzâyede ve gıbbe inkıtâ‘i’r-rağbe benim taleb ve ma‘rifetim ve ma‘rifet-i şer‘le zikr olunan Aya mahallesinde vâki‘ ma‘lûmü’l-hudûd bir kıt‘a mülk dut bahçesi bin guruş semen-i medfû‘ ve makbûza gāib ani’l-beled Tahir Ağa nâm kimesneye ve mârrü’l-beyân ekmekçi dükkânını bin beş yüz guruş semen-i medfû‘ ve makbûza Togodoş nâm zimmîye ve yine kasaba-i mezbûrede Kırpınar nâm mahâlde kâin diğer bir kıt‘a mülk dut bahçesi bin dört yüz yetmiş guruş semen-i medfû‘ ve makbûza Dimitraki zimmîye bey‘ ve teslîm etmiş idi. Lâkin emlâk-ı muharrere-i mezkûreden mârru’z-zikr Aya mahallesinde kâin bahçe-i mezkûrenin semen-i misli dört bin beş yüz guruş ve dükkân-ı merkūmun semen-i misli on bin guruş ve mârrü’l-beyân Kırpınar’da kâin bahçe-i mezbûrun semen-i misli üç bin beş yüz guruş iken mersûm Togodoş zimmî ol târîhde kasaba-i mezbûrede çorbacı olmakdan nâşî emlâk-ı muharrere-i mezkûre ber-vech-i muharrer semen-i misillerinden noksân-ı fâhişe bey‘ olunmağa sebeb olmuş olmağla öyle olucak noksânları olan on dört bin otuz guruş ki min-haysü’l-mecmû‘ elli iki bin otuz guruş mersûm Togodoş zimmîden bi’l-asâle ve bi’l-vesâye taleb ederim deyü da‘vâ etdikde evvelâ meblağ-ı mecmû‘-ı mezkûr on dört bin otuz guruş hissemize müdde‘iyye-i mersûme Eleniko Nasrâniyenin takrîr-i meşrûhu üzere tasaddî eylediği sebeb da‘vâsı meşrû‘a ve iltifâta şâyân olmadığı kendüye ba‘de’t-tefhîm sâniyen mârrü’l-beyân hınta ve dakīk ve nakid husûsunda mersûm Togodoş’dan istintâk olundukda ol dahi cevâbında külliyen inkâr etmekle müdde‘iyye-i mesfûre ber-vech-i meşrûh müdde‘âsına şâhidler olmak üzere [62b] huzûr-ı şer‘de ikāme eylediği altı nefer zimmîler edâ-i şehâdet-i şer‘iyye edemeyip ve kirâren ve mirâren lede’l-istimhâl ve’l-imhâl müddet-i mehl-i şer‘î mürûr edip şâhid-i âhar ikāmesine kādire ve tahlîfe dahi tâlibe olmamağın mûcebince müdde‘iyye-i mesfûre Eleniko Nasrâniye da‘vâ-yı mezkûresiyle mersûm Togodoş zimmîye bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 29 R sene [12]57.