Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 552 Hüküm no: 688 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzili ferağ eden Rukiye bt. Hüseyin ile icar ile evde oturan Ali Beşe arasındaki alacak davası Mahmiye-i İslâmbol’da Çerâğî Hasan mahallesinde sâkine ve zâtı mu‘arrefe olan Rukiye bt. el-Hâc Hüseyin nâm hatun Davudpaşa Mahkemesi’nde meclis-i şer‘de Ali Beşe b. Mustafa nâm kimesne mahzarında ashâb-ı hayrâtdan Osman Ağa nâm sâhibü’l-hayrın vakfı müsakkafâtından olup mahalle-i mezbûrede vâki‘ bir tarafdan Âişe Hatun menzili arsası ve bir tarafdan Nâile Hatun menzili arsası ve bir tarafdan Hoca Paşa Vakfı’ndan es-Seyyid Süleyman Ağa’nın tasarrufunda olan bağçe ve bir tarafdan tarîk-i hâs ile mahdûd ma‘lûmü’l-müştemilât bir bâb vakıf menzil mezbûr Ali Beşe’nin bi’l-icâreteyn taht-ı tasarrufunda olduğu hâlde bin yüz doksan altı senesi Ramazani’l-mübâreki gurresinde menzil-i mahdûd-ı mezkûru seksen guruş bedel-i makbûz mukābelesinde bâ-ma‘rifet-i mütevellî bana ferâğ ve tefvîz ben dahi ba‘de’t-teveffüz ve’l-kabûl menzil-i mahdûd-ı mezkûrun beher şehr ecr-i misli kırk para olup menzil-i mezkûrdan bedel-i merkūmu istifâ etmedin menzil-i mezkûr şehr-i merkūmun on beşinci günü bi’l-külliye muhterik ve arsa sırfa kalmağla ben arsa-i mezbûreden kasr-ı yed ve on beş güne isâbet edip istifâ eylediğim yirmi paradan mâ‘adâ yetmiş dokuz buçuk guruş bedeli dahi mezbûr Ali Beşe’den bu esnâda taleb ve da‘vâya tesaddî etmiş idim. El-hâletü hâzihî beynimizde muslihûn tavassut edip ber-vech-i muharrer tesaddî eylediğim da‘vâ-yı mezkûremden mezbûr Ali Beşe ile altmış guruş üzerine inşâ-i akd-i sulh olup mâ‘adâ on dokuz buçuk guruşa müte‘allika âmme-i de‘âvîden mezbûr Ali Beşe’nin zimmetini ibrâ ve ıskāt eylediğimde ol dahi arsa-i mezkûreye müte‘allika da‘vâdan benim zimmetimi ibrâ ve ıskāt edip her birimiz ber-minvâl-i muharrer âharın sulh ve ibrâsını kabûl eyledik dediğini mezbûr Ali Beşe tasdîk etmeğin mûcebince bedel-i sulh-ı merkūm altmış guruşu müdde‘iye-i mezbûre Rukiye Hatun’a edâ ve teslîme mezbûr Ali Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 27 Ra sene 1197