Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 555 Hüküm no: 694 Orijinal metin no: [92a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in Mehmed b. Ali’deki alacağı konusundaki davaya sulh bedeli karşılığı son verildiği Mahmiye-i İslâmbol’da Mevlevîhâne Yenikapısı dâhilinde Veled-i Karabaş mahallesinde sâkin Mehmed b. İbrahim nâm kimesne Davudpaşa Mahkemesi’nde meclis-i şer‘de es-Seyyid Mehmed b. es-Seyyid Ali nâm kimesne mahzarında târih-i i‘lâmdan üç ay mukaddem mezbûr es-Seyyid Mehmed ile Bahr-ı sefîd’de vâki‘ Sakız adasından mahmiye-i mezbûreye gelir iken mezbûr es-Seyyid Mehmed’in umûr-ı lâzımesine bi-şarti’r-rücû‘ emriyle mâlımdan masrûfum olan altmış guruşu ben bu esnâda mezbûr es-Seyyid Mehmed’den mutâlebe eylediğimde beynimizde muslihûn tavassutuyla tesaddî eylediğim altmış guruş mutâlebemden beni mezbûr es-Seyyid Mehmed ile otuz guruş üzerine inşâ-i akd-i sulh eylediklerinde ol dahi sulh-ı mezkûru kabûl etmiş idi. El-hâletü hâzihî bedel-i sulh-ı mezkûr otuz guruşu mezbûr es-Seyyid Mehmed’den hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr Mehmed ber-vech-i muharrer müdde‘âsını lede’t-tezkiye adâletleri zâhir olan Mustafa b. Ahmed ve Mehmed Beşe b. Abdullah nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince bedel-i sulh-ı mezkûr otuz guruşu müdde‘î-i mezbûr Mehmed’e edâ ve teslîme mezbûr es-Seyyid Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Bâkiyü’l-emr li-men-lehü’l-emr. Fî 7 min-R sene 1197