Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 556 Hüküm no: 695 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Mecso’nun Karyo v. Asmal’daki alacağının vârisi olan babası Hıristo’ya verilmesi İslâmbol’da ( ) mahallesinde mütemekkin iken bundan akdem hâlik olan Mecso nâm zimmînin babası ve hasran vârisi Hıristo v. Yani nâm zimmî Davudpaşa Mahkemesi’nde meclis-i şer‘de Karyo v. Asmal nâm zimmî muvâcehesinde mûrisim oğlum merkūm Mecso zimmî hâl-i hayatında târih-i i‘lâmdan üç sene mukaddem merkūm Karyo zimmîye mâlından bi-tarîki’l-emâne otuz guruş def‘ ü teslîm ve ol dahi yedinden ba‘de’l-ahz ve’l-kabz meblağ-ı mezbûr otuz guruşu mûrisim oğlum merkūm Mecso zimmî kable’l-ahz ve’l-istifâ hâlik ve meblağ-ı mezbûr ancak bana mevrûs olmağla meblağ-ı mezbûr otuz guruşu ben <> bi’l-verâse merkūm Karyo zimmîden hâlâ taleb ederim deyü ba‘de’d-da‘vâ ve’s-suâl ve’l-inkâr müdde‘î-i merkūm Hıristo zimmîye vech-i muharrer müdde‘âsını beyândan âciz ve talebiyle merkūm Karyo zimmîye yemîn teklif olundukda ol dahi yemînden nükûl etmeğin mûcebince meblağ-ı mezbûr otuz guruşu müdde‘î-i merkūm Hıristo zimmîye edâ ve teslîme merkūm Karyo zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 10 R sene 1197