Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 266 Hüküm no: 222 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın vefat eden kardeşi Rukiye’nin davasının reddedilmesi Ma‘rûz, Medîne-i Üsküdar’da Süleyman Ağa mahallesinde sâkine iken bin iki yüz elli altı senesi şehr-i Ramazani’l-mübârekinin on dokuzuncu günü vefât eden Hammâmî Rukiye Hanım bt. Ahmed b. Abdullah’ın li-ebeveyn kız karındaşı ve hasran vârisesi derûn-ı arzuhâlde mezkûretü’l-ism mu‘arrefetü’z-zât Hadice Hanım bi’d-defa‘ât Salı günleri huzûr-ı hazret-i fetvâ-penâhîde ma‘kūd meclis-i şer‘-i münîrde müteveffâ-yı mezbûrenin kızının oğlu sâhib-i arzuhâl Abdulkadir Efendi b. Mehmed İzzet nâm kimesne muvâcehesinde mûrisem müteveffâ-yı mezbûrenin mahalle-i mezbûrede vâki‘ menzilinde sandık derûnunda mevcûd malı olan mecmû‘u elli bin dört yüz elli guruşa mu‘âdil üç yüz aded aynalı Rûmî altını ve üç yüz aded Mahmudiye nısfiyesi ve altı yüz aded direkli riyâl ve üç yüz elli aded Hayriye altınlarıyla yine menzil-i mezkûr derûnunda mevcûde hâric-ez defter eşyâsı olan mecmû‘u on bin yüz guruş kıymetli birer mavi şal ve biri demir ve biri kākum iki kürk ve bir top çitari ve biri Selimiye ve biri çitari iki anteri ve bir canfes şalvar ve kırk beş yazma yemenî ve çevre ve on bir minder ve on dört çuka yasdık ve ibrik ve dört çuka mak‘ad ve seccâde ve yirmi üç sahan ma‘a kapak ve üç sini ve sagīr ve kebîr yedi tencere ve iki mangal ve altı lenger ma‘a kapak ve altı şorba tası ma‘a kapak, dört kadayıf tepsisi, dört şamdan ve iki döşek, dört şilte ve dört yorgan ve beş baş yasdığı ve iki tulum zeyt yağı? ve bir fıçı aseli merkūm Abdulkadir Efendi fuzûlî ahz ve ketm ü ihfâ etmekle sâlifü’z-zikr ecnâs altın ve akçe ile eşyâ-i muharrere-i mezkûre mevcûde ise aynlarını müstehlek ise zikirleri mürûr eden ecnâs altın ve akçenin eyâdî-i nâsda külliyen inkıtâ‘ bulmamağla emsâlleriyle eşyâ-i muharrere-i mezkûrenin ba‘de’s-sübût kıymet-i şer‘iyyeleri olan on beş bin yüz guruş ve Haremeyn-i muhteremeyn hazîne-i celîlesi’nden mazbûtan idâre olunan evkāfdan Ayasofya-i kebîr Vakfı musakkafâtından medîne-i mezbûrede kâin Küçük Hamam demekle arîf bir bâb hamamın nısfı merkūm Abdulkadir Efendi’nin ve nısf-ı âharı kız karındaşım müteveffât-ı mezbûrenin hayatında iştirâken ve şâyi‘an bi’l-icâreteyn uhde-i tasarrufunda ve derûnunda mevcûde gedik ta‘bîr olunan eşyâ-i ma‘lûmeden ancak kız karındaşım müteveffât-ı mezbûrenin hayatında mülkü ve ol vechile merkūm Abdulkadir Efendi’nin nısf hisse-i şâyi‘asında müşâhereten müsteciresi olduğuna mebnî kız karındaşım müteveffâ-yı mezbûrenin hayatında merkūm Abdulkadir Efendi’nin bi-şartı’r-rücû‘ emriyle hamam-ı mezkûru îcâb eden mahallerinin ta‘mîr ve termîmine kırk dokuz senesi şehr-i Rebî‘ülevveli hilâlinde sekiz bin dokuz yüz yetmiş dört guruş ve elli iki senesi Şevvâli’l-mükerremi hilâlinde dokuz bin guruş ve elli üç senesi Zilka‘detü’ş-şerîfe hilâlinde on bin beş yüz otuz yedi guruş ki cem‘an merkūmun makbûzu olan yirmi sekiz bin beş yüz on yedi guruşdan merkūmun nısf hissesine isâbet edip kız karındaşım müteveffât-ı mezbûre kable’l-ahz ve’l-istîfâ fevt olmağla [63a] bana mevrûs olan on dört bin iki yüz elli beş buçuk guruş ve elli altı senesi Recebi’l-ferdi gurresinden vefâtı gününe gelince iki ay on dokuz gün müddetde hamam-ı mezkûrun hâsılâtından sagīretân-ı mezbûrenin emr ve tevkîliyle merkūmun makbûzu olup kezâlik müteveffât-ı mezbûrenin kable’l-ahz ve’l-istîfâ fevt olarak bana mevrûs olan üç bin guruş ki min-haysü’l-mecmû‘ otuz yedi bin üç yüz elli beş buçuk guruşu bana edâya mezbûr Abdulkadir Efendi’ye tenbîh olunmak bi’l-verâse matlûbumdur deyü da‘vâ etdikde ol dahi cevâbında külliyen inkâr etmekle müdde‘iyye-i merkūmun de‘âvâ-yı mezkûrelerinden sâlifü’l-beyân ecnâs altın ve akçe müdde‘âsına şâhidler olmak üzere ikāme eylediği dokuz nefer kimesneler edâ-i şehâdet-i şer‘iyye edemediklerinden gayrı her biri mazınne-i sû’ olmalarıyla tard olunup müdde‘iyye-i mezbûre de‘âvâ-yı mezkûrelerine kirâren ve mirâren lede’l-istimhâl ve’l-imhâl her birinde müddet-i mehl-i şer‘î mürûr ve bir vechile şâhid-i âdil ikāmesine kādire, tahlîfe dahi tâlibe olmamağın mûcebince müdde‘iyye-i mezbûre Hadice Hanım de‘âvâ-yı mezkûreleriyle merkūm Abdulkadir Efendi’ye bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 25 R sene [12]57.