Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 557 Hüküm no: 697 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basmacı Mehmed Beşe’nin aldığı kumaşların ücretini Mehmed Emin Ağa’ya ödemesi İslâmbol’da Langa Yenikapısı dâhilinde Kâtib Kasım mahallesinde sâkin Mehmed Emin Ağa b. el-Hâc Ahmed nâm kimesne Davudpaşa Mahkemesi’nde meclis-i şer‘de Basmacı Mehmed Beşe b. Mehmed nâm kimesne mahzarında mezbûr Mehmed Beşe zimmetinde mukaddemâ yedimden iştirâ ve kabz eylediği yirmi top dülbend semeni olan iki yüz guruşdan bâkī yüz guruş ve kezâlik top ve zirâ‘ı beynimizde ma‘lûm aba semeni olan iki yüz on beş guruşdan bâkī yüz on beş guruş ki cem‘an iki yüz on beş guruş alacak hakkımı mezbûr Mehmed Beşe’den hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihî meblağ-ı bâkī-i mecmû‘-ı mezkûr iki yüz on beş guruşu müdde‘î-i mezbûr Mehmed Emin Ağa’ya edâ ve teslîme mezbûr Mehmed Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 13 min-R sene 1197