Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 557 Hüküm no: 698 Orijinal metin no: [92b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in Artin v. Rabael’den aldığı beygir ücretinin kalanını on beş gün içinde ödeyeceği Bâ‘isü’l-i‘lâm Artin v. Rabael nâm zimmî Davudpaşa Mahkemesi’nde meclis-i şer‘de es-Seyyid Mustafa b. Mehmed nâm kimesne ile terâfu‘alarında müdde‘î-i merkūm Artin zimmînin mezbûr es-Seyyid Mustafa zimmetinde mukaddemâ yedinden müşterâ ve makbûz bir re’s kula bârgir semeni olan otuz guruşdan bâkī yirmi dört guruş alacak hakkı olduğu lede’l-mürâfa‘ati’ş-şer‘iye mezbûr es-Seyyid Mustafa’nın ikrârıyla sâbit olup mezbûr es-Seyyid Mustafa’nın meblağ-ı mezbûru hâlâ edâya iktidârı olmayıp tecîle tâlib oldukda müdde‘î-i merkūm Artin zimmî dahi meblağ-ı bâkī-i mezbûr yirmi dört guruşu târih-i i‘lâmdan on beş gün tamamında kendüye edâ ve teslîm etmek üzere mezbûr es-Seyyid Mustafa’yı tecîl eyledikde ol dahi ber-vech-i muharrer müeccelen edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 13 R sene 1197