Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 558 Hüküm no: 699 Orijinal metin no: [92b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Hanife bt. Mehmed’in kocasının kendisine “eğer sana bir daha orospu lafzıyla küfredersem alıp alacağım şart olsun” dediğini ispatlayamadığı İslâmbol’da Ali Fakih mahallesinde sâkine ve zâtı mu‘arrefe olan Hanife bt. Mehmed nâm hatun Davudpaşa Mahkemesi’nde meclis-i şer‘de zevci es-Seyyid İsmail b. es-Seyyid el-Hâc Mehmed nâm kimesne mahzarında mezbûr es-Seyyid İsmail üç def‘a akidde müsemmâ altmış guruş mehr-i müeccel tesmiyesiyle zevc-i dâhilim olduğu hâlde târih-i i‘lâmdan on beş gün mukaddem zevcim mezbûr es-Seyyid İsmail bana hitâb edip eğer ben ba‘de’l-yevm sana rospi lafzıyla şetm eder isem alıp alacağım şart olsun dedikden sonra on üç gün mürûrunda muvâcehemde bana rospi lafzıyla şetm etmekle şart-ı mezkûrun vukū‘una binâen mehr-i mezbûr altmış guruş ile nafaka-i iddet-i mu‘ayyene ve meûnet-i süknâmı zevcem mezbûr es-Seyyid İsmail’den hâlâ taleb ederim deyü ba‘de’d-da‘vâ ve’l-istintâk mezbûr es-Seyyid İsmail dahi cevâbında fi’l-vâki‘ müdde‘iye-i mezbûreye vech-i muharrer mehr-i mezkûr ile zevcesi olduğunu ikrâr lâkin şart-ı mezkûr ile şetmini bi’l-vekâle inkâr etmeğin müdde‘iye-i mezbûre Hafize Hatun ber-minvâl-i muharrer müdde‘âsını beyândan âcize ve talebiyle mezbûr es-Seyyid İsmail ba‘de’t-tahlîfi’ş-şer‘î mûcebince müdde‘iye-i mezbûre Hafize Hatun şart-ı mezkûr ve şetm-i merkūm da‘vâsıyla zevci mezbûr es-Seyyid İsmail’e bilâ-beyyine bî-vech mu‘ârazadan ba‘de’l-men‘ zevci mezbûr es-Seyyid İsmail ile ezvâc mu‘âmelesi etmek üzere Hafize Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 16 R sene 1197