Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 558 Hüküm no: 700 Orijinal metin no: [92b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Ümmügülsüm bt. İbrahim’in eşyalarını çaldığını iddia ettiği Hadice bt. Mustafa ile sulh bedeli karşılığı anlaşmaya vardığı İslâmbol’da Sîmkeş mahallesinde sâkine sâhibe-i arzuhâl zâtı mu‘arrefe Ümmügülsüm bt. İbrahim nâm hatun derûn-ı arzuhâlde mezkûretü’l-ism olup Dîvân-ı âlî çavuşlarından İbrahim Çavuş kulları mübâşeretiyle Davudpaşa Mahkemesi’ne ihzâr etdirdiği kezâlik zâtı mu‘arrefe Hadice bt. Mustafa nâm hatun mahzarında mezbûre Hadice Hatun mukaddemâ emlâkimden bir beledî döşek ve bir çit yorgan bâ-çârşeb ve bir döşek çârşebi ve bir çit mak‘ad ve bir baş yasdığı ve iki kıyye hasır ve bir sahan bâ-kapak ve bir tas ve bir tâbemi bi-gayrı hakkın fuzûlî ahz ü kabz etmekle eşyâ-i muharrere-i mezkûreyi mezbûre Hadice Hatun’dan hâlâ taleb ederim deyü tesaddî eylediği da‘vâsından bâ-vesâtet-i muslihîn mezbûre Hadice Hatun ile altmış para bedel-i makbûza sulh olup eşyâ-i muharrere-i mezkûreye ve kıymet-i şer‘iyelerine müte‘allika âmme-i de‘âvîden mezbûre Hadice Hatun’un zimmetini ibrâ ve ıskāt ol dahi sulh ve ibrâsını kabûl eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 19 min-Rebî‘ülâhir sene 1197