Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 267 Hüküm no: 223 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başçavuş İbrahim Ağa’nın tarla davasının meşru olmadığı Ma‘rûz, Asâkir-i muntazama-i Şâhâne demirli süvârîlerinden Rıza Paşa livâsında ikinci bölükde Başçavuş sâhib-i arzuhâl İbrahim Ağa b. el-müteveffâ Osman Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde İstanbul’da Nuruosmaniye Câmi‘-i şerîfi kayyımbaşısı el-Hâc Süleyman Efendi b. Mustafa muvâcehesinde Anadolu’da Bolu sancağında vâki‘ Dörtdivan nâhiyesi kurâlarından Kılıççılar karyesi sâkinelerinden derûn-ı arzuhâlde mezkûretü’l-ism mu‘arrefetü’z-zât Âişe bt. İsmail nâm [hatun] hâzıra olduğu hâlde karye-i mezkûre hudûdu dâhilinde vâki‘ Belek nâm mahâlde kâin lede’l-ahâlî ve’l-cîrân ma‘lûmü’l-hudûd altı dönüm bir kıt‘a tarla pederim mezbûr Osman Ağa’nın bâ-tapu ile’l-vefât taht-ı tasarrufunda olup bin iki yüz elli üç senesi hilâlinde pederim mezbûr Osman fevt oldukda tarla-yı mezkûr bilâ-tapu bana intikāl etmiş iken hâzıra-i mezbûre Âişe Hatun zikr olunan tarlayı bundan akdemce mârru’z-zikr Dörtdivan nâhiyesi voyvodası gāib ani’l-beled Ahmed Ağa’ya dokuz yüz guruş bedel mukābelesinde fuzûlî fâriğa ve bedel-i mezkûr dokuz yüz guruşu gāib-i mezbûr işbu merkūm el-Hâc Süleyman Efendi yediyle hâzıra-i mezbûra teslîm ve tarla-yı mezkûru el-yevm gāib-i mezbûr Ahmed Ağa bi-gayr-ı hakkın hırâset ve zirâ‘at etmek üzere olup lâkin mücerred gāib-i mezbûr Ahmed Ağa merkūm el-Hâc Süleyman Efendi yediyle tarla-yı mezkûrun bedelini ber-vech-i muharrer hâzıra-i merkūmeye mukaddemâ teslîm eylediğine binâen mezbûr el-Hâc Süleyman Efendi gāib-i mezbûrun cemî‘ husûsâtına vekîl olmuş olmağla öyle olucak tarla-yı mezkûru gāib-i mezbûrdan keff-i yed ve mahâllinde bana teslîm etdirmek üzere mezbûr el-Hâc Süleyman Efendi’ye cebr olunsun deyü takrîr-i meşrûhu üzere tasaddî eylediği iddi‘âsı meşrû‘a ve iltifâta şâyân olmadığı müdde‘î-i mezbûr İbrahim Ağa’ya tefhîm olunduğu huzûr-ı âlîlerine i‘lâm olundu. Fî 29 S sene [12]57.