Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 562 Hüküm no: 710 Orijinal metin no: [93a-9] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veled-i Karabaş mahallesinden Mustafa b. Mehmed, karısı Fatma ve oğulları Mustafa’nın uygunsuz hareketlerinden dolayı mahalleden çıkarılmaları Ashâb-ı arzuhâl İslâmbol’da Silivrikapısı dâhilinde Veled-i Karabaş mahallesi imâmı es-Seyyid Ahmed Efendi b. Hüseyin b. Hüseyin ve müezzini Molla İbrahim b. Abdullah ve sâir ahâlisinden es-Seyyid İbrahim Ağa b. Mehmed ve Ahmed Bey b. Mehmed ve el-Hâc Mehmed Efendi b. Süleyman ve Molla Abdullah b. Veliyüddin ve es-Seyyid Halil Beşe b. es-Seyyid Mehmed ve Ali Beşe b. Halil ve Bekçi Mustafa b. Süleyman ve İbrahim b. Ahmed ve Hüseyin Efendi b. Hüseyin nâm kimesneler derûn-ı arzuhâlde mezkûrü’l-ism olup mûmâ-ileyh Mustafa mübâşeretiyle Davudpaşa Mahkemesi’nde meclis-i şer‘de Mustafa b. Mehmed nâm kimesne ile zevcesi zâtı mu‘arrefe Fatıma bt. Veliyüddin ve oğulları diğer Mustafa mahzarlarında mezbûrûn Mustafa ve Fatıma ve diğer Mustafa mahalle-i mezbûrede bir menzilde sâkinler olup lâkin kendi hâllerinde ırzlarıyla mukayyed olmayıp sâkin oldukları menzillerine [93b] ricâl ve nisâdan mechûlü’l-ahvâl kimesneler duhûl ve hurûc eylediğinden gayrı dilâzâr ve bî-edeb olmalarıyla dâimâ civârında olan komşulara envâ‘-ı şütûm-ı galîza ile şetm âdet-i müstemirreleri olmağın mezbûrûnun bed-lisânlarından cümlemiz müte’ezzî ve ihrâk havfında olduğumuz ecilden bundan akdem mezbûrûna defa‘âtle tenbîh olundukda bir dürlü mütenebbihler olmamalarıyla mezbûrûn Mustafa ve Fatıma Hatun ve diğer Mustafa mahallemizden çıkıp âhar mahalleye nakl ve iskân eylemeleri matlûbumuzdur deyü her biri mezbûrûn muvâcehelerinde sû-i hâl üzere olduklarını haber verdiklerinde mezbûrûn Mustafa ve Fatıma Hatun ve diğer Mustafa dahi târih-i i‘lâmdan on güne değin mahalle-i mezbûreden âhar mahalleye nakletmek üzere ta‘ahhüd eyledikleri ba‘de’t-tescîl bi’l-iltimâs huzûr-ı âlîlerine i‘lâm olundu. Fî 3 Ca sene 1197