Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 563 Hüküm no: 711 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesindeki attar dükkânı sahibi olan Osman Ağa’ya lâzım olduğundan kiracısı Abdulkadir’in dükkânı boşaltması Mahmiye-i İslâmbol’da Altımermer kurbünde Kâtib Muslihiddin mahallesinde sâkin Osman Ağa b. Hafız Mehmed Efendi Davudpaşa Mahkemesi’nde meclis-i şer‘de el-Hâc Abdulkadir b. Mehmed nâm kimesne mahzarında ashâb-ı hayrâtdan merhûm Bayram Paşa Vakfı müsakkafâtından olup mahmiye-i mezbûrede Avratpazarı kurbünde Canbaziye mahallesinde kâin bi’l-icâreteyn taht-ı tasarrufumda olan ma‘lûmü’l-hudûd iki kepenk bir bâb attâr dükkânınında mezbûr el-Hâc Abdulkadir beher şehir yetmişer para ücret ile müstecirim olup lâkin dükkân-ı mezkûrun bana lüzûmu olmağla beynimizde olan akd-i icâreyi fesh birle dükkân-ı mezkûru tahliye ve bana teslîme mezbûr el-Hâc Abdulkadir’e tenbîh olunmak murâdımdır deyü ba‘de’d-da‘vâ ve’l-istintâk ve’l-ikrâr mûcebince zikr olunan dükkânı işbu târih-i i‘lâm şehri gāyetinde tahliye ve sâhibi müdde‘î-i mezbûr Osman Ağa’ya teslîme mezbûr el-Hâc Abdulkadir’e tenbîh olunduğu bi’l-iltimâs huzûr-ı âlîlerine i‘lâm olundu. Fî 3 min-Cumâdelûlâ sene 1197