Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 566 Hüküm no: 717 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinde vefat eden Osman b. Ahmed’den kalan kireçteki haklarının vârislerden Halil ve Hadice’ye verilmesi Mahmiye-i İslâmbol’da Ali Fakih mahallesinde sâkin iken bundan akdem vefât eden Osman b. Ahmed’in verâseti zevce-i menkûha-i metrûkesi Emine bt. İbrahim nâm hatun ile li-ebin er karındaşı Halil nâm kimesne ve li-ebin kız karındaşı Hadice nâm hatuna münhasıra ve mesele-i mîrâsları dört sehm i‘tibârıyla bir sehmi zevcesi mezbûre Emine Hatun’a ve iki [sehmi] mezbûr Halil’e ve bir sehmi mezbûre Hadice Hatun’a isâbeti tahakkukundan sonra kendi nefsinden asîl ve kız karındaşı Hadice Hatun tarafından zikri âtî husûsa vekîl olduğu zâtını ârifân es-Seyyid Süleyman Efendi b. es-Seyyid Ali ve İbrahim b. Hasan şehâdetleriyle şer‘an sâbit olan mezbûr Halil Davudpaşa Mahkemesi’nde meclis-i şer‘de Bostânî İbrahim b. el-Hâc Mehmed nâm kimesne mahzarında mûrisimiz müteveffâ-yı mezbûr Osman’ın mezbûr Bostânî İbrahim’in menzilinde kırk kantar kireçden süzme bir kuyu derûnunda mevcûde kireç mûrisimiz müteveffâ-yı mezbûrun hayatında ile’l-vefât yedinde mülkü ve ba‘de vefâtihî i‘tibâr-ı mezkûr üzere bize mevrûs olmağın zikr olunan kireçden ber-i‘tibâr mezkûr benim ve kız karındaşım müvekkilem mezbûrenin üç sehm hisse-i irsiye-i ma‘lûmemize isâbet eden kireci mezbûr Bostânî İbrahim’den bi’l-asâle ve bi’l-vekâle hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebince zikr olunan kirecin üç sehmini müdde‘î-i mezbûr Halil’e def‘ ü teslîme mezbûr Bostânî İbrahim’e tenbîh olunduğu bi’l-iltimâs huzûr-ı âlîlerine i‘lâm olundu. Fî 12 Ca sene 1197