Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 268 Hüküm no: 224 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine ve Ayşe’nin üvey valideleri Ümmügülsüm aleyhindeki miras davalarında anlaşma sağlanması İhrâç şüd. Ma‘rûz, Medîne-i Üsküdar’a muzâfe Gekbüze kazâsı sâkinlerinden olup bin iki yüz kırk üç senesi şehr-i Rebî‘ülâhiri hilâlinde vefât eden Kasaboğlu es-Seyyid İsmail Ağa b. Süleyman’ın verâseti zevce-i menkûha-i metrûkesi Ümmügülsüm Hatun bt. Mustafa ile vâlidesi Şerife Emine Hatun bt. Ahmed ve babası mezbûr Süleyman ve merkūme Ümmügülsüm Hatun’dan mütevellid sulbî sagīr oğlu İsmail’e ve zevce-i uhrâsı müteveffât Emine Hatun’dan mütevellidler sulbiye kebîre kızları Şerife Âişe ve Şerife Emine ve mukaddemâ sagīre ve hâlâ kebîre kızları Şerife Reşide ve Şerife Hadice’ye münhasıra ve ba‘dehu bin ikiyüz kırk beş senesi şehr-i Rebî‘ülevveli hilâlinde sagīr-i mezbûr İsmail dahi vefât edip verâseti vâlidesi mezbûre Ümmügülsüm Hatun ile ceddi mezbûr Süleyman’a münhasıra ve tashîh-i mesele-i mîrâsları bi-hükmi’l-münâsahati’ş-şer‘iyye dört yüz otuz iki sehmden olup sihâm-ı mezbûreden seksen sehmi zevce-i mezbûr Ümmügülsüm Hatun’a ve otuz dokuz sehmden yüz elli altı sehmi mezbûrât Şerife Âişe ve Şerife Reşide ve Şerife Hadice’ye ve yetmiş iki sehmi mezbûre Emine Hatun’a ve yüz yirmi dört sehmi eb-i mezbûr Süleyman’a isâbeti tahakkukundan sonra verese-i merkūmûndan sâhibât-ı arzuhâl zâtları mu‘arrefeler benât-ı mezbûrât Şerife Âişe ve Şerife Emine hatunlardan her biri Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i şerîf-i enverde zikri âtî bağa vaz‘-ı yedi mütehakkık olan derûn-ı arzuhâlde mezkûretü’l-ism kezâlik mu‘arrefetü’z-zât zevce-i mezbûre Ümmügülsüm Hatun muvâcehesinde kazâ-i mezkûrda Ova Toprağı’nda vâki‘ lede’l-ahâlî ve’l-cîrân ma‘lûmü’l-hudûd kürûmu mülk bir kıt‘a bağ babamız ve mûrisimiz müteveffâ-yı evvel-i mezbûrun hayatında ile’l-vefât müstakıllen yedinde mülkü olup ba‘de vefâtihî bi-tarîkı’l-münâsaha bizimle mezbûr Ümmügülsüm Hatun’a ve verese-i sâire-i merkūmûna mevrûs olmuş iken üveyi vâlidemiz mezbûre Ümmügülsüm Hatun bağ-ı mezkûru müstakılleten fuzûlî zabt ve vaz‘-ı yed etmekle ber-mûceb-i münâsaha-i mezbûre bizim hisse-i şâyi‘amızdan keff-i yed birle mahâllinde bize teslîme üveyi vâlidemiz mezbûre Ümmügülsüm Hatun’a tenbîh olunmak bi’l-verâse matlûbumuzdur deyü da‘vâ eylediklerinde ol dahi cevâbında, bağ-ı mezkûr ber-minvâl-i muharrer müteveffâ-yı evvel-i mezbûrun hayatında ile’l-vefât yedinde mülkü olup ba‘de vefâtihî ber-mûceb-i münâsaha mezbûre müdde‘iyât-ı mezbûrât ile kendüye ve verese-i sâire-i merkūmûna mevrûs olduğunu ikrâr, lâkin mârru’z-zikr bin iki yüz kırk beş senesi şehr-i Rebî‘ülâhiri’nin dokuzuncu günü eb-i merkūm Süleyman ile mezbûretân Şerife Âişe ve Şerife Rukiye hatunlar ve mezbûre Şerife Hadice Hatun ile gāibetü ani’l-meclis mezbûre Şerife Reşide’nin ceddeleri ve ol târîhde sulbî sagīr-i mezbûra bâ-hüccet-i şer‘iyye vasiyy-i mansûbeleri mezbûre Şerife Âmine hatunlardan her biri bi’l-asâle ve bi’l-vesâye bağ-ı mezkûrda olan hisse-i şâyi‘alarını mezbûrât Şerife Hadice ve Şerife Reşide’nin hisse-i şâyi‘alarıyla ma‘an mesûğ-ı şer‘îye binâen Sûk-ı sultânî’de lede’l-müzâyede ol târîhde semen-i misli on bin elli dokuz buçuk guruş semen-i medfû‘ ve makbûza bâ-izn-i şer‘ bana bey‘ ü teslîm eylediklerinde ben dahi iştirâ ve kabz ü kabûl etmemle ol vechile bağ-ı mezkûr irsen ve şirâen yedimde müstakılleten mülküm olmağla ol vechile bi-hakkın vaz‘-ı yed ederim deyü müdde‘iyât-ı mezbûrâtın inkârlarına mukārın def‘a tasaddî edip ol vechile beynlerinde münâza‘a cereyânı esnâsında dâfi‘a-i mezbûre ber-vech-i muharrer def‘ini bağ-ı mezkûrun hudûdunu irâe ederek isbât için mahâllinde ber-nehc-i şer‘-i kavîm terâfu‘ olunmağla tarafeynden her biri bi’l-ittifâk râzılar oldukları huzûr-ı [âlîlerine i‘lâm olundu]. Fî 8 Ca sene [12]57.