Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 566 Hüküm no: 718 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine hayatta iken Ali Efendi’nin kendisine olan borcunu hibe ettiğinden vârislerin bu parayı talep edemeyecekleri Mahrûse-i Galata muzâfâtından Tophâne kasabasında sâkine iken bundan akdem vefât eden Şerife Emine bt. Mehmed nâm hatunun verâseti zevce-i metrûkü es-Seyyid Osman nâm kimesne ile li-ebeveyn er karındaşı oğulları es-Seyyid İbrahim ve es-Seyyid Abdullah ve es-Seyyid Eyüb evlâd-ı es-Seyyid Halil nâm kimesnelere münhasıra <> ve mesele-i mîrâsları altı sehm i‘tibârıyla üç sehmi zevci mezbûr es-Seyyid Osman’a ve birer sehmden üç sehmi mezbûrûn es-Seyyid İbrahim ve es-Seyyid Abdullah ve es-Seyyid Eyüb’den her birine isâbeti tahakkukundan sonra mezbûr es-Seyyid Eyüb asâleten ve kendi nefsinden asâleten ve karındaşı mezbûr es-Seyyid Abdullah tarafından zikri âtî husûsa vekîl olduğu es-Seyyid Süleyman b. Ahmed <> ve Ahmed Beşe b. Ömer nâm kimesneler şehâdetleriyle şer‘an sâbit olan mezbûr es-Seyyid İbrahim vekâleten Davudpaşa Mahkemesi’nde meclis-i şer‘de İmâm el-Hâc Ali Efendi b. el-Hâc Mehmed mahzarında mûrisem müteveffât-ı mezbûre Şerife Emine Hatun mukaddemâ hayatında mezbûr el-Hâc Ali Efendi’ye mâlından bi-tarîki’l-emâne altmış yedi guruş def‘ ü teslîm ve ol dahi yedinden ba‘de’l-ahz ve’l-kabz meblağ-ı mezbûr altmış yedi guruşu mûrisemiz mezbûre Şerife Emine Hatun kable’l-ahz ve’l-istifâ fevt ve meblağ-ı mezbûr bize mevrûs olmağın meblağ-ı mezbûr altmış yedi guruşdan i‘tibâr-ı mezkûr üzere bizim üç sehmimize isâbet eden otuz üç buçuk guruşu mezbûr el-Hâc ali Efendi’den asâleten ve vekâleten hâlâ taleb ederiz deyü da‘vâ etdiklerinde ol dahi cevâbında meblağ-ı mezbûr altmış yedi guruş hâlâ zimmetinde olduğunu ikrâr lâkin müteveffât-ı mezbûre Şerife Emine Hatun hâl-i hayatında meblağ-ı mezbûr altmış yedi guruşu bana hibe-i sahîha-i şer‘iye ile hibe ve temlik ve teslîm ve meblağ-ı mezbûr mutâlebesinden zimmetimi ibrâ ve ıskāt ve ben dahi ber-vech-i muharrer ittihâb ve temellük ve tesellüm ve kabz ve ibrâsını kabûl etmiş idim deyü eylediği def‘ini şühûd-ı udûlden el-Hâc Mehmed b. Süleyman ve İbrahim b. Mustafa nâm kimesneler şehâdetleriyle vech-i şer‘î üzere bi’l-muvâcehe isbât etmeğin mûcebince müdde‘iyân-ı mezbûrân es-Seyyid Eyüb ve es-Seyyid İbrahim meblağ-ı mezbûr otuz üç buçuk guruş mutâlebesiyle asâleten ve vekâleten mezbûr el-Hâc Ali Efendi’ye bî-vech mu‘ârazadan men‘ olundukları bi’l-iltimâs huzûr-ı âlîlerine i‘lâm. Fî 14 min-Ca sene 1197