Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 270 Hüküm no: 225 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Hasan’ın miras davasında anlaşma sağlanması Ma‘rûz, Medîne-i Üsküdar’a muzâfe Gekbüze kazâsına mülhak Kartal kasabası sâkinelerinden iken bundan akdem vefât eden Hadice bt. Halil b. Mustafa nâm hatunun li-ebeveyn er karındaşı kızı ve zî-rahm cihetinden hasran vârisesi idüğü zâhir olan sâhibe-i arzuhâl mu‘arrefetü’z-zât Ümmügülsüm bt. Hasan nâm hatun şifâhen sâdır olan fermân-ı âlîlerine imtisâlen Salı günü huzûr-ı hazret-i fetvâ-penâhîde ve ba‘dehu dâr-ı müşârün-ileyhde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde derûn-ı arzuhâlde isimleri mezkûr Mehmed Ağa ve Ali Ağa ibney İbrahim nâm kimesneler muvâcehelerinde mevrûsem müteveffât-ı mezbûrenin hîn-i vefâtında yanında mevcûd bir kıt‘a defter nâtık olduğu üzere terekesi esmânı olup ancak bana mevrûs olan bin yedi yüz otuz üç guruşu mezbûrân Mehmed Ağa ve Ali Ağa’dan her biri bi’l-ma‘iyye fuzûlî ahz ve istihlâk etmeleriyle meblağ-ı mezkûr bin yedi yüz otuz üç guruşu mezbûrân Mehmed Ağa ve Ali Ağa’dan bi’l-verâse damânen taleb ederim deyü da‘vâ eylediğimde mezbûrân Mehmed Ağa ve Ali Ağa dahi cevâblarında biz müteveffât-ı mezbûrenin li-ebeveyn ammi oğulları İbrahim’in oğulları olup ol vechile müteveffât-ı mezbûreye usûbet-i nesebiye cihetinden [64a] hasran vârisler ve verâsetde senden mukaddem olmamızla ber-mantûk-ı defter-i mezkûr terekesi esmânı olan meblağ-ı mezkûr bin yedi yüz otuz üç guruşu bi-hakkın ahz ve istihlâk etmişidik deyü inkârıma mukārin eyledikleri verâset müdde‘âlarında mezbûrân Mehmed Ağa ve Ali Ağa’dan her biri kâzibler olup müteveffât-ı mezbûreye kat‘â vârisler olmadıklarını ve ancak benim müteveffât-ı mezbûreye ber-vech-i muharrer zî-rahm cihetinden hasran vârise olduğumu işbu meclis-i şer‘de ba‘de’l-ikrâr ve tasdîk, muslihûn tavassutuyla beynimiz ıslâh ve tanzîm olunup ben ber-vech-i muharrer tasaddî eylediğim meblağ-ı mezkûr bin yedi yüz otuz üç guruş müdde‘âmdan mezbûrân ile bi’t-tav‘ ve’r-rızâ yedi yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ iki bin yedi yüz otuz üç guruşa varınca ziyâdesi olan bin otuz üç guruşu mutâlebesine müte‘allika da‘vâdan merkūmân Mehmed Ağa ve Ali Ağa’nın zimmetlerini kabûllerini hâvî ibrâ ve iskāt eyledim deyü mukırra-i mezbûre Ümmügülsüm Hatun’un bi’l-cümle kelimât-ı meşrûhasını merkūmân Mehmed Ağa ve Ali Ağa’dan her biri tasdîk ve bedel-i sulh-ı mezkûr yedi yüz guruşu müdde‘iyye-i mezbûre Ümmügülsüm Hatun’a edâya ta‘ahhüd eyledikleri tescîl ve huzûr-ı âlîlerine i‘lâm olundu. Fî 18 R sene [12]57.