Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 271 Hüküm no: 226 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Osman Ağa’nın satmış olduğu evini boşaltarak müşterisi Seyyid Hüseyin Ağa’ya teslim etmesi Ma‘rûz, Medîne-i Üsküdar’da Kefçe mahallesinde sâkin sâhib-i arzuhâl es-Seyyid Hüseyin Ağa b. Osman b. Abdullah nâm kimesne tarafından husûs-ı âti’l-beyânda vekîl olduğu Abdullah Ağa b. Eyüb ve İbrahim Ağa b. Mehmed nâm kimesneler şehâdetleriyle ber-nehc-i şer‘î sâbit olan el-Hâc Osman Ağa b. Ebubekir nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de müvekkil-i merkūmun mukaddemâ kayınpederi derûn-ı arzuhâlde mezkûrü’l-ism na‘lband Osman Ağa b. Mehmed nâm kimesne muvâcehesinde mahalle-i mezbûrede vâki‘ ma‘lûmü’l-hudûd bir bâb vakıf menzil mezbûr Osman Ağa’nın bi’l-icâreteyn uhde-i tasarrufunda iken mezbûr Osman Ağa bundan akdem menzil-i mezkûru bedel-i ma‘lûm ve makbûz mukābelesinde bâ-re’y-i mütevellî ferâğ-ı kat‘î ile müvekkilim mezbûr es-Seyyid Hüseyin Ağa’ya ferâğ ve tefvîz eylediğinde, ol dahi teferruğ ve tefevvüz ve kabûl eyledikden sonra mezbûr Osman Ağa menzil-i mezkûrda kat‘an alâka ve medhali kalmayıp menzil-i mezkûr husûsuna müte‘allika da‘vâdan müvekkilim mezbûrun zimmetini kabûlü hâvî ibrâ ve iskāt etmiş iken mezbûr Osman Ağa menzil-i mezkûru tahliye ve müvekkilim mezbûra teslîm etmemekle suâl olunup menzil-i mezkûru tahliye birle müvekkilim mezbûra teslîme mezbûr Osman Ağa’ya tenbîh olunmak matlûbumdur deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr ü i‘tirâf ve menzil-i mezkûru ber-minvâl-i muharrer tahliye birle müvekkilim mezbûr es-Seyyid Hüseyin Ağa’ya teslîme ta‘ahhüd eylediği [ba‘de]’t-tescîl huzûr-ı [âlîlerine i‘lâm olundu]. Fî 9 Ca sene [1]257.