Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 574 Hüküm no: 737 Orijinal metin no: [95a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah ile Mehmed b. Zeyneddin boşanmış olup mehrin altmış bir gün sonra ödeneceği İslâmbol’da Samatya kapısı dâhilinde el-Hâc Hüseyin mahallesinde sâkine ve zâtı mu‘arrefe Safiye bt. Abdullah nâm hatun Davudpaşa Mahkemesi’nde meclis-i şer‘de zevc-i dâhili es-Seyyid el-Hâc Mehmed b. es-Seyyid eş-Şeyh Zeyneddin mahzarında mezbûr es-Seyyid el-Hâc Mehmed zevcim olup lâkin beynimizde hüsn-i mu‘âşeretimiz olmamağla zimmetinde ma‘kūdun-aleyh olan yirmi guruş mehr-i müeccelimin beş guruş ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid el-Hâc Mehmed ile muhâla‘a-i sahîha-i şer‘iye ile hul‘ olduğumuzda ol dahi hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum olan cihet-i karzdan dört buçuk guruşa müte‘allika âmme-i da‘vâdan ben zevcim mezbûr es-Seyyid el-Hâc Mehmed’in zimmetini ibrâ ve ıskāt eylediğimde ol dahi ibrâmı kabûl eyledikden sonra zevcim mezbûr es-Seyyid el-Hâc Mehmed’in mehr-i müeccel-i bâkī-i mezkûr on beş guruşu hâlâ bana edâya iktidârı olmayıp istimhâl eyledikde mehr-i müeccel-i bâkī-i mezkûru târih-i i‘lâmdan altmış bir gün tamamında bana edâ etmek üzere zevc-i muhâlı‘ım mezbûr es-Seyyid el-Hâc Mehmed’i bi’r-rızâ imhâl eylediğimde ol dahi ber-vech-i muharrer edâya ta‘ahhüd eyledi deyü tarafeynin ikrâr ve tasdîkleri tescîl olunduğu bi’l-iltimâs huzûr-ı âlîlerine i‘lâm olundu. Fî 2 min-C sene 1197