Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 575 Hüküm no: 738 Orijinal metin no: [95a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey ile Cerrah Mehmed Paşa Medresesi’ni kiralayan Bakkal Kademli arasındaki icar davasına sulh bedeli karşılığı son verildiği Bâ‘isü’l-i‘lâm Mehmed Bey b. Şahbaz Paşazâde Ahmed Bey tarafından ber-vech-i âtî vekîl olduğu es-Seyyid Molla Ali b. İsa ve Ahmed b. Mustafa nâm kimesneler şehâdetleriyle sâbit olan diğer es-Seyyid Molla Ali b. es-seyyid Mustafa Davudpaşa Mahkemesi’nde meclis-i şer‘de Bakkāl Kademli v. Manol nâm zimmî muvâcehesinde merkūm Kademli zimmî bundan akdem vukū‘ bulan harîk-i kebîrde ihrâc eylediği bakkāl emti‘asını vaz‘ etmek içün İslâmbol’da Cerrâh Mehmed Paşa Medresesi’nin dershânesini beher şehr dörder guruş ücret tesmiyesiyle merkūm Kademli zimmîye ben bi’l-vekâle îcâr ve teslîm ve ol dahi istîcâr ve tesellüm ve kabûl ve ücret-i müsemmâ-yı mezkûreden târih-i i‘lâm şehri gurresine gelince sekiz ayda zimmetinde terâküm eden otuz iki guruşu merkūm Kademli zimmîden ben bi’l-vekâle hâlâ taleb ederim deyü tesaddî eylediği da‘vâsından bâ-vesâtet-i muslihîn merkūm Kademli zimmî ile on iki guruş bedel-i makbûza sulh olup mâ‘adâ yirmi guruşa müte‘allika da‘vâdan merkūm Kademli zimmînin zimmetini bi’l-vekâle ibrâ ve ıskāt eylediğinde ol dahi sulh ve ibrâsını kabûl eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî ( ) min-C sene 1197