Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 587 Hüküm no: 766 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Hasan’ın Evliya mahallesindeki çörekçi dükkânını içindeki âletlerle birlikte Hafız Mehmed Emin, Hafız Süleyman ve Emine Hatun’a kiraya verdiği Zâtı mu‘arrefe olan Hadice bt. Hasan nâm hatun Davudpaşa Mahkemesi’nde meclis-i şer‘de Hafız Mehmed Emin ve Hafız Süleyman ibney Mustafa nâm kimesneler asâleten ve emâneten Hatun bt. Mustafa’nın sulbî kebîr oğlu ve tarafından ber-vech-i âtî vekîli olduğu mezbûre Hadice Hatun’un ikrârıyla sâbit olan mezbûr Hafız Mehmed Emin mahzarlarında mahmiye-i İslâmbol’da Mevlevîhâne Yenikapısı kurbünde el-Hâc Evliyâ mahallesinde vâki‘ ma‘lûmü’l-hudûd iki kepenk bir bâb çörekçi dükkânı ile dükkân-ı mezkûr derûnunda mevcûde beyne’l-hıref gedik ta‘bîr olunur ber-mûceb-i defter iki terâzî ve dört kürek ve elli vakıyye evân-ı nühâsiye ve sâir âlât-ı lâzıme-i ma‘lûmenin yirmi yedi sehm i‘tibârıyla sekizer sehmden on altı sehm-i şâyi‘leri mezbûrân Hafız Mehmed Emin ve Hafız Süleyman’ın ve on bir sehm-i şâyi‘i müvekkile-i mezbûre Emine Hatun’un yedlerinde mülk ve hakları olduğu hâlde işbu yedimde olan bir kıt‘a istiğlâl hücceti mantûkunca bin yüz doksan üç senesi şehr-i Rebî‘ülâhirinin on beşinci günü mezbûrân Hafız Mehmed Emin ve Hafız Süleyman ve müvekkile-i mezbûre Emine Hatun yedimden istidâne eyledikleri cihet-i karzdan beş yüz guruş mukābelesinde zikr olunan dükkân ve âlât-ı mezkûreyi bi-tarîki’l-istiğlâl bana bey‘ ve teslîm ben dahi ber-vech-i muharrer iştirâ ve tesellüm ve kabûl eylediğimden sonra ben dükkân-ı mezbûru gıbbe’t-tahliyeti’ş-şer‘î ve’t-tekābuzi’l-mer‘î âlât-ı mezkûresiyle târih-i mezbûrdan beher şehr altışar guruş onar para ücret tesmiyesiyle mezbûrân Hafız Mehmed Emin ve Hafız Süleyman ve müvekkile-i mezbûre Emine Hatun’a îcâr ve teslîm onlar dahi ba‘de’l-istîcâr ve’t-tesellüm ve’l-kabûl târih-i mezbûrdan işbu târih-i i‘lâm şehri gurresine gelince kırk dokuz ay on beş günde cem‘an üç yüz dokuz guruş on beş para ücretin yüz altmış dokuz guruş yirmi beş parasını yedlerinden ahz ü kabz edip yüz otuz dokuz guruş otuz parası zimmetlerinde bâkī kalmağla hâlâ taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihümâ ücret-i bâkī-i mezkûr yüz otuz dokuz guruş otuz paranın edâsıyla mezbûrân Hafız Mehmed Emin ve Hafız Süleyman bi’l-asâle ve bi’l-vekâle ilzâm olundukları bi’l-iltimâs huzûr-ı âlîlerine i‘lâm olundu. Fî 22 min-C sene 1197