Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 588 Hüküm no: 767 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mito v. Andriya’nın Sefer’e olan beygir ücretinden kalan borcunu taksitle ödeyeceği Bâ‘isü’l-i‘lâm Sefer v. Döğenci? nâm zimmî Davudpaşa Mahkemesi’nde meclis-i şer‘de Mito v. Andriya nâm zimmî muvâcehesinde merkūm Mito zimmî târih-i i‘lâmdan dört gün mukaddem yedimden iştirâ ve kabz eylediği bir re’s siyâh bârgir semeninden bâkī on buçuk guruş alacak hakkım olmağla hâlâ taleb ederim deyü ba‘de’d-da‘vâ ve’l-istintâk merkūm Mito zimmî dahi cevâbında fi’l-vâki‘ kaziyye vech-i muharrer üzere olduğunu ikrâr lâkin meblağ-ı bâkī-i mezbûr on buçuk guruşu benim hâlâ edâya iktidârım olmayıp tecîle tâlib olduğumda müdde‘î-i mesfûr dahi târih-i mezbûrdan beher hafta tamamında altmışar para verip mecmû‘unu yedi hafta tamamında kendüye edâ ve teslîm etmek [üzere] bi’r-rızâ beni tecîl etmiş idi deyü ba‘de’d-def‘ ve’l-ikrâr alâ-mûcibi ikrârihî meblağ-ı bâkī-i mezbûr on buçuk guruşu müdde‘î-i merkūm Sefer zimmîye ber-vech-i muharrer müeccelen ve mukāssatan edâ ve teslîme merkūm Mito zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-C sene 1197