Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 272 Hüküm no: 228 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyatya bt. Papa Manol’un Mustafa Ağa’dan borç alması (bey‘ bi’l-vefâ) Medîne-i Üsküdar’a muzâfe Gekbüze kazâsına tâbi‘ Darıca karyesi mütemekkinelerinden olup şahsı ta‘rîf-i şer‘î ile mu‘arrefe olan Boyatya bt. Papa Manol nâm Nasrâniye meclis-i şer‘-i hatîr-i lâzımü’t-tevkīrde bâ‘isü’l-vesîka el-Hâc Mustafa Ağa b. Abdullah b. Abdullah tarafından ber-vech-i âtî husûsda vekîl-i şer‘îsi Ali Ağa b. Mehmed nâm kimesne mahzarında ikrâr-ı tâm ve takrîr-i kelâm edip müvekkil-i merkūm el-Hâc Mustafa Ağa’nın malından işbu hâzırân bi’l-meclis İstavri v. Lazari ve sadrî kebîr oğlum Bakkāl Dimitri v. Tanaş zimmîler kefâletleriyle istidâne ve kabz ve umûruma sarfla istihlâk eylediğim iki bin beş yüz guruş deynim mukābelesinde bâ-hüccet-i şer‘iyye müstakılleten yedimde mülküm olup karye-i merkūmede Yukarı mahallede kâin ma‘lûmü’l-hudûd ve’l-müştemilât bir bâb menzilimi müvekkil-i merkūm el-Hâc Mustafa Ağa’ya bi-tarîkı’l-vefâ bey‘ ve teslîm eylediğimde ol dahi ber-vech-i muharrer iştirâ ve teslîm ve kabûl eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb ve imlâ olundu. Fi’s-sâbi‘ min-şehri Rebî‘i’l-âhir sene seb‘a ve hamsîn ve mi’eteyn [ve] elf. [Şuhûdü’l-hâl:] Tahtacı Mehmed Salih Ağa, Derviş Mustafa Ağa, Muhzır Mehmed Ağa ve gayruhum.