Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 588 Hüküm no: 768 Orijinal metin no: [97a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniye bt. Dimitri’nin kendisine küfreden İstirati v. Mitrofan’a açtığı tazir davasından vazgeçtiği İslâmbol’da Topkapısı kurbünde Bâyezid Ağa mahallesinde mütemekkine ve şahsı mu‘arrefe Eleniye bt. Dimitri nâm Nasrâniye Davudpaşa Mahkemesi’nde meclis-i şer‘de yine mahalle-i mezbûre mütemekkinlerinden Tabib İstirati v. Mitrofan nâm zimmî muvâcehesinde merkūm İstirati zimmî târih-i i‘lâmdan iki gün mukaddem mahalle-i mezbûrede vâki‘ menzilim kapısı önünde bana muvâcehemde bire arsız ve bî-edeb ve fâhişe lafızlarıyla şetm etmekle mûcib-i şer‘îsini hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre Eleniye Nasrâniye ber-vech-i muharrer müdde‘âsını şühûd-ı Nasârâdan Mihal v. Yuvan nâm zimmî ile şahısları mu‘arrefeler Fotine bt. Yani ve Katerina bt. Yani nâm Nasrâniyeler şehâdetleriyle bi’l-muvâcehe vech-i şer‘î üzere ba‘de’l-isbât şâhidûn-ı mezbûrûn Mihal ve Fotine ve Katerina’nın tezkiyeleri içün bi’l-iltimâs kıbel-i şer‘den mezûnen irsâl olunan kuzâtdan başkâtib vekîli mevlana es-Seyyid Mustafa Sadullah Efendi b. es-Seyyid el-Hâc Mehmed Said Efendi mahalle-i mezbûre câmi‘-i şerîfi havlusuna varıp zahr-ı i‘lâmda muharrerü’l-esâmî kimesneler huzûrlarında akd-i meclis-i şer‘-i âlî eyledikde lede’t-tezkiye merkūmûn Mihal ve Fotine ve Katerina’nın şehâdetleri makbûle ve şer‘an merkūm İstirati zimmîye ta‘zîr lâzım geldikden sonra beynlerine muslihûn tavassutuyla müdde‘iye-i mersûme Eleniye Nasrâniye ber-vech-i muharrer merkūm İstirati zimmîye lâzım gelen ta‘zîrden meccânen fâriğa olup husûs-ı mezkûra müte‘allika âmme-i de‘âvîden merkūm İstirati zimmî ile hâzıratân bi’l-meclis şahısları mu‘arrefeler zevcesi diğer Katerina bt. Kostandi ve kayınanası Mariye bt. Nikola nâm Nasrâniyelerden her birinin zimmetlerini ibrâ ve ıskāt eyledikde onlar dahi ibrâsını ba‘de’l-kabûl merkūm İstirati zimmî ve zevcesi ve kayınanası mersûmetân Katerina ve Mariye Nasrâniyeler ve hâzırân bi’l-meclis merkūm İstirati zimmînin li-ebeveyn er karındaşı Mihal ve şahsı mu‘arrefe anası Anaştasya Nasrâniyeden her biri müdde‘iye-i mersûme Eleniye Nasrâniyeye ba‘de’l-yevm ta‘zîri mûcib elfâz ile şetm etmemek üzere ta‘ahhüd ve bu vechile kat‘-ı münâza‘a eylediklerini mevlana-yı mezbûr mahâllinde ketb ü tahrîr ve mâ‘an mürsel ümenâ-i şer‘le meclis-i şer‘e gelip alâ-mûcibi ikrârihâ ve takrîr eylediği bi’l-iltimâs huzûr-ı âlîlerine i‘lâm olundu. Fî 25 min-C sene 1197 Şühûdü’l-hâl: el-Hâc İbrahim Efendi imâm-ı mahalle-i mezbûre, el-Hâc İbrahim Efendi b. Ahmed imâm vekîli, Müezzin Molla Mustafa b. el-Hâc Halil, Molla Ali b. Halil, Ali Ağa b. Mehmed, Kiryako v. Yani, Anasti v. Todori, Loto v. Dimitri ve gayruhum.