Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 590 Hüküm no: 770 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Miyo’nun borcuna kefil olan Belhoron v. Yorgi’nin parayı Panayot v. Hıristo’ya ödemesi Bakkāl tâifesinden Panayot v. Hıristo nâm zimmî Davudpaşa Mahkemesi’nde meclis-i şer‘de yine tâife-i mezbûreden Belhoron v. Yorgi nâm zimmî muvâcehesinde yine tâife-i mezbûreden gāib ani’l-meclis Yanaki v. Miyo nâm zimmî zimmetinde mukaddemâ yedimden istidâne ve kabz eylediği cihet-i karzdan ber-mantûk-ı temessük iki yüz on altı guruş seksen akçe alacak hakkımın edâsına tarafeynden bi’l-emr ve’l-kabûl kefâlet-i sahîha ile işbu merkūm Belhoron zimmî kefîl ve zâmin olmağla meblağ-ı mezbûr iki yüz on altı guruş seksen akçeyi kefâletine binâen merkūm Belhoron zimmîden hâlâ taleb ederim deyü da‘vâ etdikde ol dahi cevâbında fi’l-vâki‘ kaziyye vech-i muharrer üzere olduğunu ikrâr ve i‘tirâf edip lâkin müdde‘î-i mesfûr Panayot zimmî meblağ-ı mezbûrun on guruşunu gāib-i merkūm Yanaki zimmî yedinden ahz ü kabz edip ancak iki yüz altı guruş seksen akçe bâkī kalmış idi deyü eylediği def‘ini müdde‘î-i mesfûr Panayot zimmî inkâr etmeğin merkūm Belhoron zimmî def‘-i mezkûrunu beyândan âciz ve talebiyle müdde‘î-i mesfûr Panayot zimmîye yemîn teklif olundukda ol dahi yemînden nükûl etmeğin mûcebince meblağ-ı bâkī-i mezbûr iki yüz altı guruş seksen akçeyi müdde‘î-i mesfûr Panayot zimmîye bi-hükmi’l-kefâle edâ ve teslîme merkūm Belhoron zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-C sene 1197