Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 274 Hüküm no: 230 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Of kazası ahalisinden olup İzmir’de vefat eden Sandıkçı Ahmed’in beytülmalce el konulan terekesinin varislerine teslim olunması Ma‘rûz, Anadolu’da Trabzon kazâsına mülhak Of kazâsı kurâlarından Maki karyesi ahâlîsinden olup medîne-i İzmir’de Sandıkçılar içinde sâkin iken bin iki yüz elli üç senesi şehr-i Rebî‘ülâhiri hilâlinde fevt olan Sandıkçı Ahmed b. el-Hâc Ali b. Abdullah’ın verâseti karye-i mezbûrede sâkinler zevce-i menkûha-i metrûkesi Gözlika bt. Mustafa b. Abdullah nâm hatun ile sulbî kebîr oğlu Ali Bey ve sulbiye kebîre kızları Âişe ve Fâtıma hatunlara inhisârı tahakkukundan sonra verese-i mezbûrûndan ibn-i mezbûr Ali Bey ve zevce-i mezbûre Gözlika ve bintân-ı mezbûretân Âişe ve Fâtıma hatunlar taraflarından zikri âtî husûsda bir kıt‘a isbât-ı vekâlet hücceti nâtıka olduğu üzere vekîl-i müsbet-i şer‘îleri sâhib-i arzuhâl Abdülkerim Ağa b. Bağran? nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde zikr olunan iki yüz elli üç senesinde medîne-i mezbûre mütesellimi bulunup medîne-i mezbûrede bilâ-vâris-i ma‘rûf ve ma‘rûfe fevt olanların terekelerini bâ-emr-i âlî cânib-i beytülmâl için kabza memûr olmağla zikri âtî meblağa bi’l-emâne vaz‘-ı yedi mütehakkık olan atûfetlü Hıfzı Mustafa Paşa hazretleri taraflarından husûs-ı âti’l-beyânda vekîl-i müseccel-i şer‘îleri Hasan Ağa b. Hasan muvâcehesinde vekîl-i merkūm Hasan Ağa’nın yedinde olup zikr olunan elli üç senesi Cemâziyelûlâsı’nın on beşinci günü târîhiyle müverrah ve ol târîhde medîne-i mezbûrede nâibü’ş-şer‘i’ş-şerîf bulunan müderrisîn-i kirâmdan Meşreb Efendizâde hafîdi Ali Râik Efendi’nin imzâsıyla mümzât medîne-i mezbûre mahkemesi sicilinden muhrec bir kıt‘a defter-i kassâm nâtık olduğu üzere müteveffâ-yı mezbûr Ahmed’in hîn-i vefâtında vârisleri müvekkillerim merkūmûn karye-i mezbûrede bulunduklarına binâen yanında mevcûd ve bi’l-cümle terekesi müvekkil-i müşârün-ileyhin ma‘rifeti ve ma‘rifet-i şer‘le tahrîr ve bey‘ olunup hâsıl olan esmânından ba‘de ihrâci’l-masârıf ve’d-düyûn sahhu’l-bâkī dört bin altı yüz altmış altı guruş müvekkil-i müşârün-ileyh yine ol târîhde vekîli olan mezbûr Hasan Ağa yediyle bi’l-emâne kabz etmişler idi. El-hâletü hâzihî meblağ-ı mezkûr dört bin altı yüz yetmiş altı guruşu müvekkillerim merkūmûn için bana teslîme müvekkil-i müşârün-ileyhe izâfetle vekîl-i mezbûr Hasan Ağa’ya tenbîh olunmak bi’l-vekâle matlûbumdur deyü da‘vâ etdikde mezbûr Hasan Ağa dahi cevâbında kaziyye minvâl-i meşrûh üzere olduğunu bi’l-vekâle tâyi‘an ikrâr ve i‘tirâf etmeğin mûcebince müvekkil-i müşârün-ileyhin ber-minvâl-i muharrer bi’l-emâne makbûzları olan meblağ-ı mezkûr dört bin altı yüz yetmiş altı guruş verese-i müvekkilûn-ı mezbûrûn için vekîl-i mezbûr Abdülkerim Ağa’ya teslîme müvekkil-i müşârün-ileyhe izâfetle vekîl-i mezbûr Hasan Ağa’ya tenbîh olunduğu huzûr-ı âlîlerine i‘lâm olundu. Fî 18 Ca sene [12]57.