Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 275 Hüküm no: 231 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Melkon’un vefat eden ortağındaki alacağı olması davasının meşru olmadığı Ma‘rûz, Derûn-ı arzuhâlde mastûrü’l-ism Agob v. Melkon nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde arzuhâl eden şahsı mu‘arrefe Norina bt. Vidin nâm Nasrâniye muvâcehesinde yedimde olup bin iki yüz elli altı senesi Şa‘bânü’l-mu‘azzamının altıncı günü târîhiyle müverrah ve sâbıkā İstanbul kādısı olup Anadolu pâye-i celîlesiyle tekrîm buyurulan devletlü inâyetlü Pir Mehmed Tevfik Efendi’nin mührüyle memhûr bir kıt‘a i‘lâm-ı şer‘î nâtık olduğu üzere mesfûre Norina Nasrâniyenin sadrî kebîr oğlu olup bundan akdem hâlik olan Kirhor v. Bedros zimmî ile sağlığında elli dört senesi Şa‘bânü’l-mu‘azzamı hilâlinde ben malımdan bin beş yüz guruş ve hâlik-i mersûm Kirhor zimmî dahi malından kezâlik bin beş yüz guruş sermâye vaz‘ ve birbirine halt edip her ne fâide hâsıl olur ise beynimizde beraber iktisâm olunmak üzere mukāvele ve hâlik-i mersûm Kirhor zimmî kâbız-ı mal olarak medîne-i Üsküdar’da Çinili Câmi‘-i şerîfi kurbünde kâin mersûme Norina Nasrâniyenin nısf hisse-i şâyi‘asına mutasarrıfe olduğu bir bâb horasancı dükkânında ticâret etmek üzere akd-i şirket-i inân birle dört ay müddet ticâret ve ba‘dehu fesh-i akd-i şirket edip müddet-i mezkûrede beynimizde cereyân eden ahz ü i‘tâmızın hesâbını horasancı esnâfına mahsûs lonca odasında sehv ü galatdan ârî yegān yegān hesâb-ı sahîh ile lede’r-rü’ye benim mersûm Kirhor zimmî zimmetinde dört bin altı yüz seksen guruş alacağım zuhûr etmekle meblağ-ı mezkûr zimmetinde bana sahîhan deyni olduğunu mersûm Kirhor zimmî tâyi‘an ve kat‘iyyen ikrâr ü i‘tirâf etmiş idi. El-hâletü hâzihâ meblağ-ı merkūm dört bin altı yüz seksen guruşu mersûm Kirhor zimmîden sağlığında da‘vâ eylediğimde mersûm Kirhor zimmî dahi cevâbında benim ber-vech-i muharrer müdde‘âmı bi-tamâmihâ tâyi‘an ve kat‘iyyen ikrâr ü i‘tirâf edip lâkin ben deynim olan meblağ-ı mezkûr dört bin altı yüz seksen guruş için bin iki yüz elli beş senesi şehr-i Ramazani’l-mübârekinin on beşinci günü iki bin guruş ve sene-i merkūme Şevvâli’l-mükerreminin yirmi beşinci günü bin beş yüz guruş ve sene-i merkūme Zilka‘detü’ş-şerîfesi’nin on birinci günü malımdan bey‘ ve teslîm eylediğim vezn ve fiyatı beynimizde ma‘lûm horasan ve kireç semenlerinden alacağım olan iki bin altı yüz guruş ki cem‘an beş bin yedi yüz guruş medfû‘âtımın dört bin altı yüz seksen guruşu deynim olan meblağ-ı mezkûr dört bin altı yüz seksen guruşa takās ve mahsûb olunup bâkīsi olan bin yirmi guruşu taleb ederim deyü inkârıma mukārin benden da‘vâ ve müdde‘âsına ikāmet edemeyip tâlib-i tahlîf dahi olmamağın mûcebince hâlik-i mersûm Kirhor zimmî da‘vâ-yı mezkûresiyle bana bilâ-beyyine mu‘ârazadan ba‘de’l-men‘ mersûm Kirhor zimmînin ikrâr ü i‘tirâfı mûcebince meblağ-ı merkūm dört bin altı yüz seksen guruşu bana edâya hâlik-i mersûm Kirhor zimmîye sağlığında tenbîh olunmuş idi. El-hâletü hâzihî meblağ-ı mahkûmün-bih-i mezkûr hâlik-i mersûm Kirhor zimmî bana kable’l-edâ ve’l-îfâ hâlik olup, lâkin [ber-vech-i] muharrer dükkân-ı mezkûrun nısf hissesi mersûme Norina Nasrâniyenin uhdesinde olmağla öyle olucak benim ber-vech-i muharrer hâlik-i mersûm zimmetinde mahkûmün-bih alacağım olan meblağ-ı mezbûr dört bin altı yüz seksen guruşu dahi dükkân-ı mezkûrda hâlik-i mersûm ile sağlığında eylediğimiz ahz ü i‘tâmızdan bâkī kaldığına ve bizim esnâfça i‘tibârımız dükkâna olduğuna binâen malından bana edâ etmek üzere mesfûre Norina’ya cebr ve tenbîh olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mersûm Agob zimmî’ye tefhîm ve da‘vâ-yı mezkûresiyle mersûme Norina Nasrâniyeye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 25 R sene [12]57.