Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 71 Hüküm no: 6 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesib Karagöz mahallesinde Haremeyn Evkafı’na ait evin yapılan keşif sonucu kirasının belirlendiği Haremeyn-i Şerîfeyn Evkāfı’ndan mahrûse-i İstanbul’da Muhtesib Karagöz mahallesinde vâki‘ lede’l-ahâlî ma‘lûmü’l-hudûd olan menzilin yevmî üç akçe icâre-i müeccele ile müste’ciri olan işbu hâmiletü’l-kitâb Kamer bt. Abdullah nâm hatun meclis-i şer‘-i şerîfde bi’l-fi‘il evkāf-ı mezbûre mütevellîsi olan fahrü’l-akrân Hamza Bey b. Abdülmennan nâm bevvâb-ı sultânî mahzarında takrîr-i kelâm edip bundan akdem menzil-i mezbûru yevmî üç akçe icâre-i müeccele ve üç bin akçe icâre-i mu‘accele ile mütevellî-i mezbûr Hamza Bey bana îcâr edip ve üç bin akçe yedimden vakf için ahz ettikden sonra bazı yerleri dahi harâba müşrif olup ta‘mîrine vakfın müsâ‘adesi olmamağla icâre-i mu‘acceleme mahsûb olmak üzere kendi mâlımdan ta‘mîrine izin verilmeğin ben dahi ta‘mîrine dört bin yedi yüz akçe harc edip cümle vakıfda yedi bin yedi yüz akçe icâre-i mu‘accelem olmuşidi, lâkin hâlâ menzil-i mezbûrun icâre-i müeccelesi ecr-i mislinden ziyâdedir kıbel-i şer‘den üzerine varılıp ecr-i misli keşf olunmasın taleb ederim deyip mütevellî-i mezbûr Hamza Bey istintâk olundukda kaziyye minvâl-i mezkûr olduğunu ikrâr ile cevâb vermeğin cânib-i şer‘den Mevlânâ Halil b. Behram ve hâssa mi‘marlarından üstâd Muharrem b. Abdullah irsâl olunup zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp merkūm Hamza Bey mahzarında keşf olundukda menzil-i merkūmun yevmî iki akçe ecr-i mislidir deyu mi‘mâr-ı mezbûr ve sâir ehl-i vukūf Müslimânlar ittifâk ettiklerinde mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr etmeğin mâ-hüve’l-vâkı‘ bi’t-taleb ketb olundu. Tahrîren fî-evâili şehri Şa‘bâni’l-mu‘azzam sene li-sitte aşere ve elf. Şühûdü’l-hâl: Ömer Efendi b. ( ) el-müderris, Hasan Çavuş b. Abdullah, Ramazan Çavuş b. Abdullah, Mustafa Bey ve gayruhüm