Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 72 Hüküm no: 7 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesib Karagöz mahallesinde Haremeyn Evkafı’na ait evin Kamer Hatun bt. Abdullah’a kiraya verildiği Mahrûse-i İstanbul’da vâki‘ Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘de işbu hâmiletü’l-kitâb Kamer bt. Abdullah nâm hatun mahzarında ikrâr ve takrîr-i kelâm edip evkāf-ı mezbûreden olup mahrûse-i mezbûrede Muhtesib Karagöz mahallesinde vâki‘ hudûdunun bir tarafı vakf-ı mezbûre ve bir tarafı haydarhâne demekle ma‘rûfe zâviyeye ve iki tarafı tarîk-i âmma müntehî olan menzilde bundan akdem merkūme hatun yevmî üç akçe icâre-i müeccele ve üç bin akçe icâre-i mu‘accele ile sâkine iken bazı yerleri harâba müşrif oldukda icâre-i mu‘accelesine mahsûb olmak üzere kendi mâlından benim iznimle ta‘mîrine dört bin yedi yüz akçe harc u sarf edip cümle icâre-i mu‘accelesi yedi bin yedi yüz akçe oldukdan sonra menzil-i merkūmun icâre-i müeccelesi ecr-i mislinden ziyâdedir deyu mezbûre Kamer Hatun kıbel-i şer‘den menzil-i mezbûre nâib ve mi‘mâr götürüp benim mahzarımda keşf eylediklerinde yevmî iki akçe ecr-i mislidir deyu mi‘mâr ve ehl-i vukūf Müslimânlar ittifâk edip yedine hüccet verilmiş idi. Hâlâ menzil-i mezbûru yevmî ikişer akçe icâre-i müeccele ve yedi bin yedi yüz akçe icâre-i mu‘accele ile târîh-i kitâbdan otuz yıl tamâmına varınca icâre-i tavîleyi tecvîz eden eimme-i müctehidîn -rıdvânullâhî te‘âlâ aleyhim ecma‘în- üzere tecdîd-i müte‘âkideyne muhtâc olmaksızın her üç yılda bir akd-i cedîd olup akd-i evvelin inhâsı akd-i sânînin ibtidâsı olmak üzere mezbûre Kamer Hatun’a tevliyetim hasebiyle îcâr edip ol dahi vech-i mezkûr üzere istîcâr eyledi mukaddemâ vakfa nakd verdiği üç bin akçe ile menzil-i mezbûrun ta‘mîrine sarf eylediği dört bin yedi yüze akçe cem‘an yedi bin yedi yüz akçe olup mezbûre Kamer Hatun’un vakıfda icâre-i mu‘accelesidir dedikde mütevellî-i mezbûrun ikrâr-ı meşrûhu müste’cire-i mezbûre Kamer Hatun dahi bi’l-müvâcehe tasdîk ve bi’l-müşâfehe tahkīk ekdikde mâ-hüve’l-vâkı‘ bi’t-taleb ketb olundu. Tahrîren fî-gurreti Muharremi’l-harâm min-şühûr sene seb‘a aşere ve elf. Şühûdü’l-hâl: es-Sâbikūn.