Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 72 Hüküm no: 8 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh Ağa’nın oturduğu Haremeyn Vakfı’na ait evin tamiri için keşif yapıldığı Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘-i şerîfe gelip takrîr-i kelâm ve ta‘bîr ani’l-merâm edip evkāf-ı mezbûreden olup mahrûse-i İstanbul’da Atmeydanı kurbünde merhûm Mehmed Paşa Câmi‘-i şerîfi mahallesinde vâki‘ lede’l-ahâlî ma‘lûmü’l-hudûd olup Nuh Ağa nâm kimesne[nin] sâkin olduğu menzilin hâricinde tûlen yirmi sekiz ve kadden on zirâ‘ taş duvar ve dâhilinde tûlen on yedi zirâ‘ ve kadden sekiz zirâ‘ taş duvarı bundan akdem bi’l-külliye hedm olup müceddeden binâya muhtâc olduğundan mâ‘adâ taşrada iki kenîf tecdîdi lâzım oldukda izn-i şer‘le mâl-ı vakıfdan tecdîd ve ta‘mîr eylemişidim. Hâlâ kıbel-i şer‘den üzerine varılıp ne mikdâr akçeye tahammülü vardır keşf olunmasın taleb ederim dedikde cânib-i şer‘den Mevlânâ Mehmed Çelebi b. Süleyman el-müderris ve hâssa mi‘mârlardan üstâd Muharrem b. Abdullah irsâl olunup zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp keşf olundukda fi’l-vâki‘ zikr olunan duvarlar ve iki kenîf tecdîd olunmağın harc olunan taşlarının ve kuşaklarının ve tahtalarının ve kiremidlerinin ve mismârının ve kireç ve horasanisinin [3b] ve üstâdiyye ve ırgadiyye ve hammâliyesinin on dokuz bin beş yüz akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerini mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr eylemeğin mâ-hüve’l-vâkı‘ bi’t-taleb ketb olundu. Tahrîren fî-evâhiri Rebî‘i’l-evvel li-sene seb‘a aşere ve elf. Şühûdü’l-hâl: Kurt Bey b. Abdullah, Mehmed Bey b. Abdullah, Ali b. Abdullah, Mustafa b. Abdullah ve gayruhüm.