Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 73 Hüküm no: 9 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküblü mahallesinde Haremeyn Evkafı’na ait evin kirasının yapılan keşif sonucu yeniden belirlendiği Haremeyn-i Şerîfeyn Evkāfı’ndan olup mahrûse-i İstanbul’da Ayasofya-i kebîr kurbünde Üsküblü mahallesinde vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte‘addideyi müştemil olan menzilin yevmî otuz akçe icâre-i müeccele ve icâre-i mu‘accele ile müste’ciri olan işbu hâfızü’l-kitâb fahrü’l-a‘yân Dilaver Ağa b. Abdülmennan nâm zevvâk-ı sultânî meclis-i şer‘-i şerîfe gelip takrîr-i kelâm ve ta‘bîr ani’l-merâm edip menzil-i mezbûrun icâre-i müeccelesi ecr-i mislinden ziyâdedir kıbel-i şer‘den üzerine varılıp ecr-i misli keşf olunmasın taleb ederim dedikde cânib-i şer‘den bu fakīr hâssa mi‘mârlardan üstâd Muharrem b. Abdullah ve zeyl-i kitâbda mastûrü’l-esâmî olan bî-garaz Müslimânlar ile menzil-i mezbûrun üzerine varılıp bi’l-fi‘il mütevellîsi olan Hamza Bey b. Abdullah mahzarında keşf olundukda menzil-i merkūm harâba müşrif olmağla ücret-i mezbûre ecr-i mislinden ziyâdedir yevmî yirmi akçe ecr-i mislidir deyu mi‘mâr-ı mezbûr ve sâir ehl-i vukūf Müslimîn ittifâk eylediklerinde işbu hurûf ketb olunup yed-i tâlibine def‘ olundu. Tahrîren fî-evâhiri Rebî‘i’l-evvel min-şühûr sene seb‘a aşere ve elf. Şühûdü’l-hâl: Fahrü’l-a‘yân İbrahim Ağa b. Abdülmennan ez-zevvâku’s-sultânî, zahrü’l-emsâl Hürrem Ağa b. Abdülmüte‘âl ez-Zevvâku’s-sultânî, fahrü’l-a‘yân Receb Ağa b. Abdülmennan el-müteferrika, Ahmed Çavuş b. Abdullah, Veli Bey b. ( ) el-bevvâb, Ferhad Bey b. Abdullah, Perviz Bey b. Abdullah, Osman b. ( ) ve gayruhüm.