Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 277 Hüküm no: 232 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un Hamamcı Paşaoğlu aleyhinde olan bahçe davasının Trabzon mahkemesince görülmesi Ma‘rûz, Sâdır olan fermân-ı âlîlerine imtisâlen işbu arzuhâle nazar olundukda Anadolu’da Trabzon kazâsında İmâret mahallesinde vâki‘ ma‘lûmü’l-hudûd bir kıt‘a mülk bahçe sâhibe-i arzuhâl Ümmügülsüm Hatun’un yedinde mülkü iken mezbûrenin zevci olup bundan akdem vefât eden Ali nâm kimesne bahçe-i mezkûru işbu târîhden yirmi sene mukaddem zevcesi merkūme Ümmügülsüm Hatun zevci müteveffâ-yı mezbûru tarafından tevkîl etmiş değil iken derûn-ı arzuhâlde ismi mezkûr Çakmakçı Ahmed nâm kimesneye dört yüz guruş semen-i medfû‘a fuzûlî bi-tarîkı’l-vefâ bey‘ ve teslîm, ol dahi ba‘de’l-iştirâ ve’l-kabz, ol vechile bahçe-i mezkûr mezbûr Çakmakçı Ahmed’in yedinde iken mezbûr Ahmed vefât edip bahçe-i mezkûru müteveffâ-yı mezbûr Çakmakçı Ahmed’in veresesi kendülerine mevrûs olmak zu‘muyla Hamamcı Paşaoğlu nâm kimesneye semen-i ma‘lûm ve makbûz mukābelesinde bey‘ ve teslîm, ol dahi iştirâ ve kabz etmeleriyle bahçe-i mezkûr el-yevm merkūm Hamamcı Paşaoğlu’nun yedinde olup lâkin mezbûre Ümmügülsüm Hatun bey‘-i mezkûru mücîze olmadığına mebnî bahçe-i mezkûrdan keff-i yed birle kendüye teslîm etmek üzere merkūm Hamamcı Paşaoğlu ile mahâllinde bi’l-muvâcehe ber-nehc-i şer‘-i şerîf terâfu‘ olunmak üzere medîne-i mezbûre müşîri devletlü atûfetlü paşa hazretlerine ve nâibine hitâben bir kıt‘a emr-i âlî ısdârı istid‘âsından ibâret olduğu işbu arzuhâl meâlinden ve Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede lisânen takrîrinden müstebân olmağla ol bâbda sâhibe-i arzuhâl merkūmenin istid‘âsına müsâ‘ade-i aliyyeleri re’y-i âlîlerine menût idüğü huzûr-ı âlîlerine i‘lâm olundu. Fî 28 Ca sene [12]57.