Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 74 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküblü mahallesinde Haremeyn Evkafı’na ait evin tamiri için keşif yapılıp kiracısı Dilaver Ağa’ya kendi parasıyla tamir için izin verildiği Haremeyn-i Şerîfeyn Evkāfı’ndan olup mahrûse-i İstanbul’da Ayasofya-i kebîr kurbünde Üsküblü mahallesinde vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte‘addideyi müştemil olan menzilin yevmî yirmi akçe icâre-i müeccele ve icâre-i mu‘accele ile müste’ciri olan işbu hâmilü’l-kitâb fahrü’l-a‘yân Dilaver Ağa b. Abdülmennan nâm zevvâk-ı sultânî meclis-i şer‘-i şerîfe gelip takrîr-i kelâm ve ta‘bîr ani’l-merâm edip menzil-i mezbûru hâlâ bi’l-külliye harâba müşrif olup ta‘mîr ve meremmâtı lâzım gelmişdir, kıbel-i şer‘den üzerine varılıp ne mikdâr akçe ile ta‘mîr olunup keşf olundukdan sonra icâre-i mu‘acceleden mahsûb olmak üzere kendi mâlımdan ta‘mîre izin taleb ederim dedikde bu fakīr hâssa mi‘mârlardan üstâd Muharrem b. Abdullah ve zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp evkāf-ı mezbûreye bi’l-fi‘il mütevellî olan Hamza Bey b. Abdullah nâm bevvâb-ı sultânî mahzarında keşf olundukda fi’l-vâki‘ menzil-i mezbûrun muhavvata-i dâhiliyyesinde altı bâb odanın bazı camları ve ocakları ve sıvaları ve tavanı ve iki sofanın camları ve sıvaları ve nerdübânı ve dehlîzi ve trabzanı ve on altı zirâ‘ sundurması ve hamâmının kazganı ve câmekânı ta‘mîr ve meremmâta muhtâc olduğundan mâ‘adâ tûlen ve kadden dört yüz iki zirâ‘ müceddeden taş duvar ihdâsı lâzım olup ve muhavvata-i hâriciyyesinde dokuz aded odaların ocakları ve döşemeleri ve tavan ve sofasının sıvası ve dehlîzi ve tahta-pûşu ve orta kapısı ve maslağı ve kuyu ağzı tecdîd ve ta‘mîre ve cümle sakıflarının kiremidleri açılıp tekrâr örtülmeğe muhtâc olmağın bu zikr olunan ta‘mîr ve tecdîde lâzım gelen taşa ve keresteye ve kiremide ve mismâra ve kireç ve horasaniye ve üstâdiyye ve ırgadiyye ve hammâliyeye cem‘an elli dokuz bin üç yüz kırk akçe ancak kifâyet eder deyu mi‘mâr-ı mezbûr ve sâir ehl-i vukūf Müslimânlar ittifâk eylediklerinde vakfın tecdîd ve ta‘mîre müsâ‘adesi olmamağın icâre-i mu‘accelesine mahsûb olmak üzere menzil-i mezbûru kendi mâlından ta‘mîre mûmâ-ileyh Dilaver Ağa’ya izin verilip mâ-hüve’l-vâkı‘ bi’t-taleb ketb olundu. Tahrîren fî-evâhiri Rebî‘i’l-âhir min-şühûr sene seb‘a aşere ve elf. Şühûdü’l-hâl: es-Sâbikūn.