Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 74 Hüküm no: 11 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alipaşa-yı atik mahallesinde Haremeyn Evkafı’na ait evin tamiri için keşif yapıldığı Haremeyn-i Şerîfeyn Evkāfı’ndan olup mahrûse-i İstanbul’da merhûm Alipaşa-yı atîk mahallesinde vâki‘ hudûdunun bir tarafı Gönderci Ferhad Vakfı’na ve bir tarafı Hazînedâr ( ) Vakfı’na ve bir tarafı el-Hâc Kasım b. ( ) mülküne ve bir tarafı tarîk-i âmma müntehî ola[n] menzilin yevmî bir akçe icâre-i müeccele ve icâre-i mu‘accele ile müste’ciri olan işbu hâmilü’l-kitâb Mahmud Çelebi b. Hamza meclis-i şer‘-i şerîfe gelip takrîr-i kelâm ve ta‘bîr ani’l-merâm edip bundan akdem menzil-i mezbûrun arz-ı hâliyyesine müceddeden bir tahtânî oda ve bir ahır ve bir kenîf ihdâsı ve tûlen yirmi dört ve kadden beş zirâ‘ taş duvarın tecdîdi ve kadîmden olan odaların ta‘mîri lâzım oldukda izn-i şer‘î ve ma‘rifet-i mütevellî ile kendi mâlımdan icâre-i mu‘accelem olmak üzere tecdîd ve ta‘mîr eylemiş idim. Hâlâ kıbel-i şer‘den üzerine varılıp ne mikdâr akçeye tahammülü vardır keşf olunmasın taleb ederim dedikde cânib-i şer‘den Mevlânâ Mehmed Çelebi b. Süleyman el-müderris ve hâssa mi‘mârlardan üstâd Muharrem b. Abdullah irsâl olunup zeyl-i kitâbda mastûrü’l-esâmî olan Müslimîn ile menzil-i mezbûrun üzerine varılıp bi’l-fi‘il evkāf-ı mezbûre mütevellîsi olan fahrü’l-akrân Hamza Bey b. Abdullah nâm bevvâb-ı sultânî mahzarında keşf olundukda fi’l-vâki‘ menzil-i mezbûrun arz-ı hâliyesine mezbûr Mahmud Çelebi kendi mâlından bir tahtânî oda ve ahır ve bir kenîf ve kırk beş zirâ‘ taş kaldırımı ve zikr olunan taş duvarı müceddeden binâ eylediğinden mâ‘adâ kadîmden harâba müşrif olan üç bâb odaların üzerinin kiremidi ve camlarını ta‘mîr ve meremmât eylemeğin bu cümleye harc olunan taşın ve kiremidin ve tuğlanın ve kireç ve horasanın ve sâir kereste-i mütenevvi‘asının ve mi‘mârının ve kadîmden bir kenîfin tahliyesinin ve neccâriyye ve ırgadiyye ve hammâliyesinin cem‘an otuz üç bin seksen bir akçeye tahammülü vardır deyu mi‘mâr-ı mezbûr ve sâir ehl-i vukūf Müslimânlar ittifâk eylediklerin mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr eylemeğin mâ-hüve’l-vâkı‘ bi’t-taleb ketb olundu. Tahrîren fî-evâhiri Cemâziyelâhire min-şühûr sene seb‘a aşere ve elf. Şühûdü’l-hâl: Fahrü’l-mülâzimîn Hüseyin Efendi b. Hamza, Mehmed Halîfe b. Ali el-İmâm, Mahmud b. Süleyman el-İmâm, Mustafa Halîfe b. Ömer el-Müezzin, Mustafa b. İbrahim el-İmâm, Hüseyin b. Ali el-İmâm, el-Hâc Mustafa b. Süleyman, Yusuf Bey b. ( ) el-Bevvâb, el-Hâc Ca‘fer b. Arslan, Ali b. Sıyami, Safi b. Ramazan el-Kayyım ve gayruhüm.