Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 75 Hüküm no: 12 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Altıpoğaçaoğlu mahallesindeki Haremeyn Evkafı’na ait evin hassa mimarlarından Muharrem Bey tarafından kiralanması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘-i şerîfde hâssa mi‘mârlardan işbu hâmilü’l-kitâb Muharrem Bey b. Abdülvahhab mahzarında ikrâr ve takrîr-i kelâm edip evkāf-ı mezbûreden olup mahrûse-i İstanbul’da Altıpoğaçaoğlu mahallesinde vâki‘ bir tarafdan yine evkāf-ı mezbûreye ve bir tarafdan Merhabazâde demekle ma‘rûf Abdullah Efendi mülküne ve bir tarafdan mahalle-i mezbûre mescidine vakıf menzile ve bir tarafdan tarîk-i hâssa müntehî olup tahtânî dört bâb harâba müşrif olmuş odayı ve bir su kuyusunu ve muhavvatayı müştemil olan menzil târîh-i kitâbdan mâh be-mâh altmışar akçeye mezbûr Muharrem Bey’e tevliyetim hasebiyle îcâr edip ve menzil-i mezbûrun ta‘mîrine kendi mâlından her ne mikdâr akçe harc ederse ba‘dehû icâre-i mu‘accele olmak üzere ta‘mîr ve meremmâta izin verdim ol dahi vech-i merkūm üzere istîcâr ve kabûl eyledi dedikde mütevellî-i mezbûrun ikrâr-ı meşrûhu müste’cir-i mezbûr Muharrem Bey dahi bi’l-müvâcehe tasdîk ettikde mâ-hüve’l-vâkı‘ bi’t-taleb ketb olundu. Tahrîren fi’l-yevmi’l-hâmis aşer min-şehri Cemâziyelâhire li-sene seb‘a aşere ve elf. Şühûdü’l-hâl: Abdürrahim b. Abdürrahim el-İmâm, Murtaza b. Bekir, Rıdvan Halife b. Abdullah el-Müezzin, Abdi b. Nebi, Mustafa b. Fazlullah, Ali b. Süleyman ve gayruhüm.