Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 76 Hüküm no: 13 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilaver Ağa b. Abdülmennan ve eşi Ayşe Hatun’nun Haremeyn Evkafı’na ait Üsküblü mahallesindeki evi kiraladıkları Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘-i şerîfde Dergâh-ı âlî -dâme mahfûfen bi’l-me‘âlî- zevvâklarından fahrü’l-a‘yân Dilaver Ağa b. Abdülmennan kendi tarafından asâleten ve zevcesi fahrü’l-muhadderât Âişe Hatun bt. el-merhûm Abdülkerim Çavuş tarafından husûs-ı âti’z-zikre vekîl olup nehc-i şer‘î üzere vekâleti sâbite oldukdan sonra mütevellî-i mezbûre Hamza Bey mûmâ-ileyh Dilaver Ağa mahzarında ikrâr ve takrîr-i kelâm edip evkāf-ı mezbûreden Mahrûse-i İstanbul’da Ayasofya-i kebîr kurbünde Üsküblü mahallesinde vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte’addide ve hamâmı ve muhavvateyni müştemil olan menzili bundan akdem yevmî otuz akçe icâre-i müeccele ve otuz bin akçe icâre-i mu‘accele ile Hüsameddin Efendi b. ( ) nâm kimesnenin tasarrufunda olmağın menzil-i mezbûrun hakk-ı tasarrufunu benim iznim ile mûmâ-ileyh Dilaver Ağa ve zevcesi müvekkile-i mûmâ-ileyhâ Âişe Hatun ber-vech-i iştirâk tefvîz edip kendinin mukaddemâ vakıfda olan otuz bin akçe icâre-i mu‘accelesini merkūmân Dilaver Ağa ve Âişe Hatun yedlerinden bi’t-tamâm alıp kabz eylemeğin ben dahi menzil-i mezbûru târîh-i kitâbdan yevmî otuz akçe icâre-i müeccele ile mesfûrân Dilaver Ağa ve Âişe Hatun’a ber-vech-i iştirâk tevliyetim hasebi ile îcâr edip onlar dahi vech-i merkūm üzere istîcâr ve kabûl eylediler dedikde mütevellî-i mezbûr Hamza Bey’in ber-vech-i <> meşrûh cârî olan ikrârını mûmâ-ileyh Dilaver Ağa dahi asâleten ve vekâleten bi’l-müvâcehe tasdîk ve bi’l-müşâfehe tahkīk ekdikde mâ-hüve’l-vâkı‘ alâ-vukū‘ihî gıbbe’t-taleb ketb olundu. Tahrîren fî-evâili Muharremi’l-harâm min-şühûri sene seb‘a aşere ve elf. Şühûdü’l-hâl: Fahrü’l-a‘yân İbrahim Ağa b. ( ) ez-zevvâk-ı sultânî, zahrü’l-emsâl Hürrem Ağa b. Abdülmüte‘âl ez-zevvâku’s-sultânî, zübdetü’l-a‘yân Receb Ağa b. Abdülmennan el-müteferrika, Ahmed Çavuş b. Abdullah.