Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 77 Hüküm no: 14 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dilaver Ağa ile eşi Ayşe’nin kiraladıkları evin kirasıyla ilgili yapılan keşif Dergâh-ı âlî -dâme mahfûfen bi’l-me‘âlî- zevvâklarından zahrü’l-a‘yân Dilaver Ağa b. Abdülmennan kendi tarafından asâleten ve zevcesi fahrü’l-muhadderât Âişe Hatun bt. el-merhûm Abdülkerim Çavuş tarafından husûs-ı âti’z-zikre vekîl olup nehc-i şer‘î üzere vekâleti sâbite oldukdan sonra vekâleten meclis-i şer‘-i şerîfe gelip takrîr-i kelâm ve ta‘bîr ani’l-merâm edip Haremeyn-i Şerîfeyn Evkāfı’ndan olup mahrûse-i Kostantıniyye’de Ayasofya-i kebîr kurbünde Üsküblü mahallesinde vâki‘ lede’l-ahâlî ve’l-cîrân ma‘lûmü’l-hudûd olup büyût-ı müte‘addideyi müştemil olan menzil-i mezbûr bundan esbak yevmî otuz akçe icâre-i müeccele ve icâre-i mu‘accele ile benim ve zevce[m] merkūm Âişe Hatun’un ber-vech-i iştirâk tasarrufumuzda olup lâkin icâre-i müeccelesi ecr-i mislinden ziyâdedir kıbel-i şer‘den üzerine varılıp ecr-i misli keşf olunmasını asâleten ve vekâleten taleb ederim dedikde cânib-i şer‘den bu fakīr hâssa mi‘mârlardan üstâd Muharrem b. Abdullah ve zeyl-i kitâbda mastûrü’l-esâmî olan bî-garaz Müslimânlar ile menzil-i mezbûrun üzerine varılıp bi’l-fi‘il mütevellîsi olan Hamza Bey b. Abdullah nâm bevvâb-ı sultânî mahzarında keşf olundukda menzil-i mezbûr harâba müşrif olmağla ücret-i mezbûre ecr-i mislinden ziyâdedir yevmî yirmi akçe ecr-i mislidir deyu mi‘mâr-ı mezbûr ve sâir ehl-i vukūf Müslimîn ittifâk eylediklerinde işbu hurûf ketb olunup yed-i tâlibine def‘ olundu. Tahrîren fî-evâhiri Rebî‘i’l-evvel min-şühûr sene seb‘a aşere ve elf. Şühûdü’l-hâl: Fahrü’l-a‘yân İbrahim Ağa b. Abdülmennan ez-zevvâku’s-sultânî, zahrü’l-emsâl Hürrem Ağa b. Abdülmüte‘âl ez-zevvâku’s-sultânî, zübdetü’l-a‘yân Receb Ağa b. Abdülmennan el-müteferrika, Ahmed Çavuş b. Abdullah, Ferhad Bey b. Abdullah, Veli Bey b. ( ) el-bevvâb, Perviz Bey b. Abdullah, Osman b. Abdullah.