Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 77 Hüküm no: 15 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Şücâ‘bey mahallesindeki evin Mehmed b. Ali tarafından kiralanması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘-i şerîfde hâssa serrâclarından işbu hâmilü’l-kitâb zahrü’l-emsâl Mehmed Bey b. Ali mahzarında takrîr-i kelâm ve ta‘bîr ani’l-merâm edip mahrûse-i İstanbul’da Voynuk Şücâ‘bey mahallesinde vâki‘ lede’l-ahâlî ma‘lûmü’l-hudûd olan menzili bundan [akdem] el-Hâc Mustafa Bey ( ) nâm kimesne evvelâ kendi nefsine ba‘dehû evlâdına ve evlâd-ı evlâdına ba‘de’l-inkırâz Medîne-i Münevvere fukarâsına vakf ve şart edip ve evlâdından Hasan Çelebi nâm kimesne menzil-i mezbûra müstakillen mutasarrıf olmağın sene sitte aşere ve elf Şevvâli’nin on birinci gününden yirmi beş yıl tamâmına varınca yevmî ikişer akçeye mezbûr Mehmed Bey’e îcâr edip ol dahi vech-i merkūm üzere istîcâr ve kabûl eylemiş hâlâ merkūm Mehmed Bey cânib-i vakfa teberru‘an târîh-i kitâbdan beher senede ikişer sikke-i filori mukāta‘a vermeğe dahi ta‘ahhüd ve râzı oldu dedikde mütevellî-i merkūmun kelâm-ı meşrûhunu mesfûr Mehmed Bey dahi bi’l-müvâcehe tasdîk ettikde mâ-hüve’l-vâkı‘ alâ-vukū‘ihî bi’t-taleb ketb olundu. Tahrîren fî-gurreti Ramazâni’l-mübârek min-şühûri li-sene seb‘a aşere ve elf. Şühûdü’l-hâl: İbrahim Çelebi b. Mustafa, Mustafa Ağa b. Kasım, Şeyh Ahmed [b.] Şeyh Abdüllatif, Hasan Halîfe b. Ahmed.