Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 78 Hüküm no: 16 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıcı Mehmed Bey b. Abdullah’ın Haremeyn Evkafı’na ait eve yaptığı masrafların birikmiş kirasından düşüldüğü, kalanın da veresesine ödendiği Mahrûse-i İstanbul’da Koruk Mahmud mahallesi sâkinlerinden olup vefât eden Kapucu Mehmed Bey b. Abdullah nâm müteveffânın zevcesi ve sulbiye kızı Rahime nâm sagīrenin kıbel-i şer‘den mansûbe vasîsi olan Mâhçehre Hatun bt. Abdullah meclis-i şer‘-i şerîfde Haremeyn-i Şerîfeyn Evkāfı’na bi’l-fi‘il mütevellî olan işbu hâmilü’l-kitâb Hamza Bey b. Abdullah nâm bevvâb-ı sultânî mahzarında ikrâr ve takrîr-i kelâm edip evkāf-ı mezbûreden olup mahalle-i mezbûrede vâki‘ lede’l-ahâlî ma‘lûmü’l-hudûd olup tahtânî bir evi müştemil olan menzilde bundan esbak zevcim müteveffâ-yı mezbûr yevmî ikişer akçe icâre-i müeccele ile sâkin iken menzil-i mezbûrun arz-ı hâliyesine kendi mâlından mütevellî izniyle bir fevkānî oda binâ ve ihdâs ettiğinden mâ‘adâ kadîmden olan tahtânî evi dahi meremmât etmeğin cümle ihdâsı ve meremmâtı mi‘mâr tahmîni ile sekiz bin beş yüz akçe olmuşidi hâlâ müteveffâ-yı mezbûrun zimmetinde menzil-i mezbûrun yedi yıllık icâresinden dört bin beş yüz akçe bâkī kalıp terekesinden edâsı lâzım geldikde deynine kifâyet eder menkūlâtı olmamağın menzil-i mezbûre ihdâs eylediği binânın ve meremmâtın tahmîn-i mezbûr üzere dört bin beş yüz akçesi menzil-i mezbûrun yedi yıllık güzeşte icâresine mahsûb olup bâkī kalan dört bin akçeyi dahi evkāf-ı mezbûre mâlından mütevellî-i merkūm Hamza Bey bi’t-tamâm bana teslîm edip ben dahi verâsetim ve vesâyetim hasebi ile meblağ-ı mezbûr dört bin fıddî Osmânî râyicü’l-vakt akçeyi mütevellî-i merkūm yedinden alıp kabz eyledim. min-ba‘d menzil-i mezbûrda benim ve sagīre-i merkūmenin alâkamız kalmadı dedikde mukırre-i merkūmenin asâleten ve vesâyeten cârî olan ikrârını mütevellî-i merkūm dahi bi’l-müvâcehe tasdîk etti mâ-hüve’l-vâkı‘ alâ-vukū‘ihî bi’t-taleb ketb olundu. Tahrîren fî-evâhiri Şa‘bâni’l-mu‘azzam min-şühûri sene seb‘a aşere ve elf. Şühûdü’l-hâl: El-Hâc Hüseyin b. Hasan, Mehmed Ağa b. Pervâne, Mustafa b. Abdullah, Sinan Veled b. Memi eş-Şehîr bi-Ördek ve gayruhüm.