Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 79 Hüküm no: 17 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Hasan’a ait evin Mustafa Subaşı b. Kasım tarafından kiralanması Mahrûse-i İstanbul’da el-Hâc Teberrük mahallesi sâkinelerinden Rahime bt. Hasan nâm hatun meclis-i şer‘-i şerîfde işbu hâmilü’l-kitâb fahrü’l-akrân Mustafa Subaşı b. Kasım mahzarında ikrâr ve takrîr-i kelâm edip mahalle-i mezbûrede vâki‘ hudûdunun bir tarafı Sitti Hatun bt. Abdullah Vakfı’na ve bir tarafı Abdülkerim b. Abdürrahim mülküne ve bir tarafı Medîne-i Münevvere Vakfı’na ve bir tarafı tarîk-i âmma müntehî olup iki fevkānî evi ve bir matbahı ve bir fırını ve ahırı ve kenîfi müştemil olan menzil bundan akdem merkūme Sitti Hatun Hasan b. Abdullah ile vâlidem Zahide bt. Abdullah’a ve bunların evlâdına ve evlâd-ı evlâdına ba‘de’l-inkırâz Medîne-i Münevvere fukarâsına vakf ve şart edip hâlâ mezbûrân Hasan ve Zahide vefât edip ben mezbûre Zahide’nin sadriye kızı olmağla menzil-i mezbûrun süknâsı hakk-ı meşrûtum olup lâkin harâba müşrif olup ta‘mîrine vakfın mâlı olmamağın zikr olunan menzil icâresiyle ta‘mîr için cümle tevâbi‘i ile târîh-i kitâbdan yirmi beş yıl tamâmına varınca yevmî ikişer akçeye merkūm Mustafa Subaşı’ya îcâr edip ol dahi vech-i merkūm üzere istîcâr ve kabûl eyledikden sonra yirmi beş yıllık icâresi olan on sekiz bin fıddî Osmânî râyicü’l-vakt akçeyi mezbûr Mustafa Subaşı yedinden bi’t-tamâm ve’l-kemâl alıp kabz eyledim dedikde mukırre-i merkūme Rahime Hatun’un ikrâr-ı meşrûhuna müste’cir-i mezbûr Mustafa Subaşı dahi bi’l-müvâcehe tasdîk edip fi’l-vâki‘ meblağ-ı mezbûr on sekiz bin akçeyi alıp kabz eyledim dedikde mâ-hüve’l-vâkı‘ bi’t-taleb ketb olundu. Tahrîren fî-gurreti Ramazâni’l-mübârek li-sene seb‘a aşere ve elf. Şühûdü’l-hâl: Mehmed Ağa b. Ali, İbrahim Çelebi b. Mustafa, Mehmed Çelebi b. ( ) el-İmâm bi’l-mahalle, Hüseyin b. Abdullah, Sefer b. Maksud, Mehmed b. Hamza, Mahmud b. Ca‘fer, Hasan b. Abdullah, Mehmed b. Veli, Ali b. Abdullah ve gayruhüm.