Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 79 Hüküm no: 18 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin Kadıköy’deki bağının vârisleri tarafından Perviz b. Abdullah’a satışı Mahmiye-i İstanbul’da Samanveren mahallesi sâkinlerinden olup bundan akdem vefât eden Hasan Beşe b. İshak nâm müteveffânın li-ebeveyn er karındaşı Mustafa nâm kimesne asâleten ve müteveffâ-yı mezbûrun sulbiye bâliğa kızları Selime ve Emine nâm hatunlar tarafından husûs-ı âti’l-beyâna vekîl olup Hamza b. Mahmud ve İbrahim b. Şükrullah nâm kimesneler şehâdetleri ile hasm-ı şer‘î-i câhid mahzarında şer‘an vekâleti sâbite oldukdan sonra vekâleti meclis-i şer‘-i şerîfde işbu hâmilü’l-kitâb Perviz b. Abdullah nâm kimesne mahzarında ikrâr ve takrîr-i kelâm edip mezbûr Hasan Beşe fevt oldukda verâseti li-ebeveyn karındaşı olmağla bana ve kızları mezbûretân Selime ve Emine’ye münhasıra olmağın müteveffâ-yı mezbûrun terekesinden olup mahrûse-i Üsküdar kazâsına tâbi‘ Kadıköyü nâm karye sınırında Fenerbahçesi kurbünde vâki‘ iki tarafı Hasan b. İlyas nâm kimesne bağına ve bir tarafı Kurt b. Mirza tarlasına ve bir tarafı tarîk-i âmma müntehî olup tahmînen iki dönüm bir kıt‘a bağı olup alâ-vechi’l-iştirâk cümlemize intikāl edip mülk bağımızı cemî‘-i tevâbi‘i ile Perviz’e bey‘-i kat‘î ile on beş bin akçeye bey‘ ve teslîm edip ol dahi iştirâ ve tesellüm eyledikden sonra semeni olan meblağ-ı mezbûr on beş bin fıddî Osmânî râyicü’l-vakt akçeyi mezbûr Perviz’den bi’t-tamâm ve’l-kemâl alıp kabz eyledik. min-ba‘d zikr olunan bağ mezbûr Perviz’in mülk-i müşterâsıdır keyfe mâ yeşâ mutasarrıf olsun dedikde mukırr-ı mezbûrun asâleten ve vekâleten cârî olan ikrârını müşterî-i mezbûr Perviz dahi bi’l-müvâcehe tasdîk ve bi’l-müşâfehe tahkīk eyledikde mâ-hüve’l-vâkı‘ bi’t-taleb ketb olundu. Tahrîren fi’l-yevmi’r-râbi‘ min-şehri Ramazâni’l-mübârek li-sene seb‘a aşere ve elf. Şühûdü’l-hâl: Abdi Çavuş b. Mehmed, Ali Çelebi b. Abdürrahim, Rıdvan b. Abdullah, Yusuf b. Mahmud, el-Hâc Hasan b. Abdullah, el-Hâc Yusuf b. Mustafa ve gayruhüm.