Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 80 Hüküm no: 19 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin Kadıköy’deki bağının vârisleri tarafından satılıp bedelinin vasiyeti gereği Haremeyn mütevellisine verildiği Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân Hamza Bey b. Abdülmennan nâm bevvâb-ı sultânî meclis-i şer‘-i şerîfde mahrûse-i İstanbul’da Samanveren mahallesi sâkinlerinden olup bundan akdem vefât eden Hasan b. İshak nâm müteveffânın li-ebeveyn karındaşı Mustafa nâm kimesne ve müteveffâ-yı mezbûrun sulbiye bâliğa kızları Selime ve Emine nâm hatunlar tarafından husûs-ı âti’z-zikre vekîl olup Hamza b. Mahmud ve İbrahim b. Şükrullah nâm kimesneler şehâdetleri ile şer‘an vekâleti sâbite olan el-Hâc Halil b. Mustafa nâm kimesneler mahzarında ikrâr ve takrîr-i kelâm edip müteveffâ-yı mezbûr Hasan Başe hâl-i hayâtında sülüs mâlından olup mahmiye-i Üsküdar kazâsına tâbi‘ Kadıköyü nâm karye sınırında Fenerbahçesi kurbünde vâki‘ iki tarafı Hasan b. İlyas nâm kimesne bağına ve bir tarafı Kurt b. Mirza tarlasına ve bir tarafı tarîk-i âmma müntehî olup tahmînen iki dönüm bir kıt‘a mülk bağını bey‘ olunup semeni mütevellî yediyle fukarâ-i Haremeyn-i Şerîfeyne irsâl olunsun deyu vasiyyet edip hâlâ verâseti merkūmûn Mustafa ve Selime ve Emine’ye münhasıra olmağın vasiyyet-i mezbûreyi kabûl edip zikr olunan bağı on beş bin akçeye bey‘ eylediklerinden sonra semeni olan meblağ-ı merkūm on beş bin akçeyi bi’t-tamâm bana teslîm eylediler ben dahi Haremeyn-i Şerîfeyn fukarâsına irsâl için tevliyetim hasebi ile alıp kabz eyledim dedikde mütevellî-i mezbûrun ikrâr-ı meşrûhunu mezbûreyn Mustafa ve el-Hâc Halil dahi asâleten ve vekâleten bi’l-müvâcehe tasdîk ve bi’l-müşâfehe tahkīk eyledikde mâ-hüve’l-vâkı‘ bi’t-taleb ketb olundu. Tahrîren fî-evâili şehri Ramazâni’l-mübârek li-sene seb‘a aşere ve elf. Şühûdü’l-hâl: Rıdvan b. Abdullah, Yusuf b. Mahmud, el-Hâc Hasan b. Abdullah, Yusuf b. İbrahim ve gayruhüm.