Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 81 Hüküm no: 20 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Küçük Ayasofya mahallesindeki evin tamirine mütevelli tarafından izin verildiği Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânî meclis-i şer‘de işbu hâmilü’l-kitâb Rahime bt. Hüseyin nâm hatun mahzarında ikrâr ve takrîr-i kelâm edip evkāf-ı mezbûreden olup mahmiye-i İstanbul’da Küçük Ayasofya mahallesinde vâki‘ hudûdunun bir tarafı yine vakf-ı mezbûra ve bir tarafı Hüseyin Ağa Vakfı’na ve bir tarafı tarîk-i âmma ve bir tarafı tarîk-i hâssa müntehî olup tahtânî iki bâb beyt-i süflîyi ve iki sofayı ve kenîfi ve muhavvatayı müştemil olan menzilde yevmî üç akçe icâre-i müeccele ile mezbûre Rahime Hatun sâkine olup lâkin harâba müşrif olmağla ta‘mîri lâzım gelip vakfın müsâ‘adesi olmağın kendi mâlından ta‘mîr edip ba‘dehû icâre-i müeccele olmak üzere mezbûre Rahime Hatun’a tevliyetim hasebi ile meremmete izin verdim dedikde mütevellî-i mezbûrun kelâm-ı meşrûhunu müste’cire-i mezbûre dahi vicâhen tasdîk ettikde mâ-hüve’l-vâkı‘ bi’t-taleb ketb olundu. Tahrîren fî-evâhiri Zilhicceti’ş-şerîfe li-sene seb‘a aşere ve elf. Şühûdü’l-hâl: Mustafa Bey b. Abdullah, Eyüb Çelebi b. ( ), Mahmud b. Ömer, Mehmed b. Cinânî? ve gayruhüm.