Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 81 Hüküm no: 21 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskender b. Abdullah’ın Haremeyn Evkafı’na ait oturduğu ev için temessük verildiği İşbu hâmilü’l-kitâb İskender b. Abdullah nâm kimesne bi’l-fi‘il Haremeyn-i Şerîfeyn Evkāfı’na mütevellî olan fahrü’l-akrân el-Hâc Hasan Bey b. Mehmed nâm bevvâb-ı sultânînin imzâsı ile mümzâ ve hatemi ile mahtûm ve târîh-i kitâb şehrinin evâhiriyle müverrah tezkiresiyle meclis-i şer‘-i şerîfe gelip takrîr-i kelâm edip evkāf-ı mezbûreden olup mahrûse-i İstanbul’da Kayalıdere mahallesinde vâki‘ hudûdunun bir tarafı İskender b. Abdullah mülküne ve iki tarafı tarîk-i âmma ve bir tarafı tarîk-i hâssa müntehî olup fevkānî ve tahtânî iki odayı ve bir sofayı ve su kuyusunu müştemil olan menzil târîh-i kitâbdan yevmî ikişer akçe icâre-i müeccele ve iki bin akçe icâre-i mu‘accele ile mütevellî-i mezbûr bana îcâr edip ben dahi istîcâr ve kabûl eyledikden sonra icâre-i mu‘accelesi olan meblağ-ı mezbûr iki bin fıddî Osmânî râyicü’l-vakt akçeyi vakf için yedimden alıp kabz edip tasarrufuna tezkire vermişidi kıbel-i şer‘den dahi temessük taleb ederim dedikde mütevellî-i mezbûrun tezkiresine nazar olundukda min-külli’l-vücûh mezbûr İskender’in takrîrine mutâbık olmağın mâ-hüve’l-vâkı‘ bi’t-taleb ketb olundu. Tahrîren fi’t-târîhi’l-mezbûr. Şühûdü’l-hâl: es-Sâbikūn.