Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 82 Hüküm no: 22 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyinağa mahallesinde Haremeyn Evkafı’na ait Meryem Hatun bt. Halil’in oturduğu evin kirasısın ecr-i misli üzere yeniden belirlendiği Haremeyn-i Şerîfeyn Evkāfı’ndan olup mahrûse-i İstanbul’da Küçük Ayasofya kurbünde Hüseyinağa mahallesinde vâki‘ hudûdunun bir tarafı mezbûr Hüseyin Ağa Vakfı’na ve bir tarafı Mustafa b. ( ) nâm kimesne mülküne ve bir tarafı tarîk-i hâssa ve bir tarafı tarîk-i âmma müntehî olup üç bâb fevkānî ve iki tahtânî evleri ve bir matbahı ve iki su kuyusunu ve bir ahırı ve bir kenîfi ve iki muhavvatayı müştemil olan menzilin yevmî on dört akçe icâre-i müeccele ile müste’ciresi olan işbu hâmilü’l-kitâb Meryem Hatun bt. Halil meclis-i şer‘a gelip takrîr-i kelâm edip menzil-i mezbûrun icâre-i müeccelesi ecr-i mislinden ziyâdedir kıbel-i şer‘den üzerine varılıp ecr-i misli keşf olunmasın taleb ederim dedikde savb-ı şer‘den Mevlânâ Mehmed Çelebi b. Süleyman el-müderris ve hâssa mi‘mârlardan üstâd Muharrem b. Abdullah irsâl olunup zeyl-i kitâbda mastûrü’l-esâmî olan Müslimîn ile menzil-i merkūmun üzerine varılıp evkāf-ı mezbûreye bi’l-fi‘il mütevellî olan fahrü’l-akrân Hasan Bey b. Mehmed nâm bevvâb-ı sultânî mahzarında keşf olundukda yevmî on akçe menzil-i mezbûrun ecr-i mislidir deyu mi‘mâr-ı mezbûr ve sâir ehl-i vukūf Müslimânlar ittifâk eylediklerinde mevlânâ-yı mezbûr mahallinde tahrîr edip ba‘dehû meclis-i şer‘a gelip ihbâr eylemeğin mâ-vaka‘a bi’t-taleb ketb olundu. Tahrîren fî-gurreti Zilhicceti’ş-şerîfe min-şühûr sene seb‘a aşere ve elf. Şühûdü’l-hâl: Mustafa b. Hüseyin, Mehmed Çelebi b. ( ) Mahmud b. Ömer, Beşir b. İsmail ve Mehmed b. ( ), Mehmed Çelebi b. ( ) ve gayruhüm.