Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 82 Hüküm no: 23 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait evin Ahmed Bey b. Abdullah’a kiraya verilmesi Bi’l-fi‘il Haremeyn-i Şerîfeyn mütevellîsi olan fahrü’l-akrân Hasan Bey b. Mehmed nâm bevvâb-ı sultânî meclis-i şer‘-i şerîf-i lâzımü’t-teşrîf bâ‘isü hâze’l-kitâb Ali Bey b. Abdullah el-bevvâbü’s-sultânî mahzarında ikrâr-ı tav‘î ve i‘tirâf-ı mer‘î edip mahrûse-i İstanbul mahallâtından Ulvânzâde [Elvânzâde] mahallesinde vâki‘ olup bir tarafı Ahmed Bey b. Abdullah ve bir tarafı Nesli Hatun bt. İbrahim mülkü ve bir tarafı Ahmed Çelebi b. ( ) el-câbî mülkü ile ve bir tarafı tarîk-i âm ile mahdûd olup iki bâb tahtânî evleri ve ve iki gurfeyi ve bir bâb ahırı ve bi’r-i mâyı ve muhavvatayı muhtevî olup evkāf-ı mezbûreden olan menzili icâre-i mu‘accele ve müeccele ile mutasarrıf olan Ahmed Bey b. Üveys nâm kimesne vefât edip evlâd-ı zükûru kalmayıp mahlûl oldukda menzil-i mezbûru mezbûr Ali Bey’e işbu semân aşere ve elf Şevvâlü’l-mükerremi’nin gurresinden yevmî altı akçe icâre-i müeccele ile îcâr edip vakf için mezbûr Ali Bey yedinden yedi bin akçe icâre-i mu‘accele aldım, şol şartla ki menzil-i mezbûrun lâzım olan meremmetine mezbûr Ali Bey’in kendi mâlıyla ede dedikde mukırr-ı mezbûru ikrâr-ı meşrûhunda mukarrun-leh merkūm vicâhen tasdîk edicek bu hurûf gıbbe’t-taleb sebt olundu. Tahrîren fi’l-yevmi’s-sâbi‘ ve’l-ışrîn min-Şevvâli’l-mükerrem li-sene semân aşere ve elf. Şühûdü’l-hâl: İskender Bey b. Abdullah el-bevvâbü’s-sultânî, Mustafa Çelebi b. ( ) el-bevvâbü’s-sultânî, Hamza Bey b. Yusuf el-bevvâbü’s-sultânî, Eyüb Bey b. Ali el-bevvâb ve gayruhüm.