Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 83 Hüküm no: 24 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait Karamürsel’deki bazı emlakın Yeniçeri Ali Beşe’ye kiraya verilmesi Hâlâ Dârüssaâde ağası olup Haremeyn-i Şerîfeyn ve selâtîn evkāfına nâzır olan iftihârü’l-havâs ve’l-mukarrebîn muhtâr-ı ashâbi’l-izz ve’t-temkîn sâhib-i ezyâli’l-ızz ve’s-sa‘âde el-vâsıl min-merâtibi’l-mecd ve’l-celâl ilâ-âmâlihi ve irâdihi mukarrebi’l-hazreti’l-celîle el-mevsûkun-bih min-cânibi’s-saltanati’l-mahmiye el-mahfûf bi-sunûfi’l-avâtıfi’l-meliki’l-mennân el-Hâc Mustafa Ağa b. Abdurrahman hazretleri meclis-i şer‘-i hatîr-i lâzımü’t-tevkīrde Üsküdar kazâsına tâbi‘ Karamürsel nâhiyesinde Konaklı nâm karyede merhûm el-Hâc Mustafa b. Hamza’nın Haremeyn-i Muhteremeyn’e vakfeylediği evkāfa hasbî nâzır olup Dergâh-ı âlî yeniçerilerinden dördüncü deveciler cemâ‘atinden Ali Beşe b. Mehmed nâm râcil mahzarında ikrâr-ı tav‘î edip evkāf-ı mezbûreden karye-i mezbûrede vâki‘ inde’l-cîrân ve ma‘lûmü’l-hudûd olan iki bâb menzili ve bir birinin hudûdu lede’l-ahâlî ma‘lûm olan on iki kıt‘a bağları ve yine karye-i mezbûreye karîb Ereğli nâm karyede nehri ile dâyir ma‘lûmü’l-hudûd bir göz değirmeni ve Söğütlü nâm cebel nehri ile dâyir bir bâb ma‘lûmü’l-hudûd değirmeni bu cümle zikr olunan evkāfı nezâretim hasebiyle merkūm yeniçeri Ali Beşe’ye bir senesi altı bin akçeye ber-vech-i maktû‘ deruhde eyledim ve mezbûr dahi ta‘ahhüd ve kabûl eyledi, mâdâm ki ta‘yîn olunan altı bin akçeyi cânib-i vakfa edâ eyleye tasarrufuna kimse mâni‘ olmaya dedikde gıbbe’t-tasdîk vicâhen bu hurûf bi’t-taleb ketb olundu. Tahrîren fi’l-yevmi’s-sânî min-Zilka‘deti’ş-şerîfe li-sene semân aşere ve elf. Şühûdü’l-hâl: Mustafa Bey b. Hüseyin, Mustafa Çelebi [b.] Mehmed, Rıdvan Bey [b.] Abdullah, Bekir Çelebi [b.] Hamza ve gayruhüm.