Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 84 Hüküm no: 25 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı’na ait olup Fatma Hatun b. Abdülmennan’ın oturduğu evde yapılan keşif sonucu kirasında indirim yapıldığı Mahrûse-i İstanbul mahallâtından Nahılbend mahallesinden fahrü’l-muhadderât Fâtıma Hatun bt. Abdülmennan meclis-i şer‘de takrîr-i kelâm edip Haremeyn-i Şerîfeyn Evkāfı’ndan mahalle-i mezbûrede vâki‘ olup bir tarafı mahalle-i mezbûre mescidi ve bir tarafı Kara Paşa Vakfı ile ve bir tarafı Odabaşı mülkü ile ve bir tarafı tarîk-i âm ile mahdûd olup iki bâb tahtânî odaları ve bir orta sofayı ve bir ıstablı ve fırını ve bir selâmlığı ve kenîfi ve bi’r-i mâyı <> ve eşcâr-ı müsmireyi ve muhavvatayı müştemil olup icâre-i mu‘accele ve yevmî altı akçe icâre-i müeccelesi olan vakıf menzil harâba müşrif olmağın yevmî altı akçe icâre ecr-i misliden ziyâde olmağın üzerine varılıp ecr-i misli keşf olunmak taleb ederin dedikde bu fakīr ve mütevellî-i vakf-ı mezkûr Hasan Bey ve hâssa mi‘mârlardan üstâd Mustafa b. Abdullah ve Mehmed b. Ahmed ve Hüsrev b. Abdullah nâm kimesneler ve zeyl-i kitâbda mastûrü’l-esâmî bî-garaz Müslimânlar ile menzil-i mezbûrun üzerine varıldıkda fi’l-hakīka gāyet ile harâba müşrif olup yevmî altı akçe icâreye tahammülü olmayıp ecr-i misli yevmî dört akçe olmak üzere Müslimîn ittifâk ettikleri ecilden yevmî iki akçe icâresi hat olunup dört akçeye îcâr olundu şol şartla ki sâkine olup kendiden sonra vakfın olmak üzere izin verilip bu hurûf gıbbe’t-taleb setb olundu. Tahrîren fî-evâhiri Şevvâli’l-mükerrem li-sene semân aşere ve elf. Şühûdü’l-hâl: Kurt Bey el-bevvâb-ı sultânî, Derviş b. Ramazan el-kayyım, Mustafa b. Abdullah, Mehmed b. Ahmed, Hüsrev b. Abdullah, Mahmud Halîfe el-imâm, Durmuş Dede, Ahmed Bey el-bevvâb-ı sultânî ve gayruhüm.